Ձեր վստահելի աղբյուրը

«Ընտրելով «Հայաստան» դաշինքին՝ ընտրում եք ապրող, արարող, մշակութային և ստեղծագործ Հայաստանը»,- «Հայաստան» նախընտրական դաշինքի «365 օր. Ապագան սկսվում է  այսօր» ծրագրի մշակութային հայեցակարգային հիմնական դրույթները ներկայացնելով՝ ասաց դաշիքնի մաս կազմող ՀՅԴ ԳՄ անդամ Լիլիթ Գալստյանը։

Նա ընդգծեց՝ իրենց թիմի՝ «Հայաստան» դաշինքի համար կրթության, գիտության կողքին մշակույթը ևս լինելու է  պետական քաղաքականության առանցքային առաջնահերթություն։ 

«Երեք տարի առաջ, երբ օպտիմալացման հիմնավորմամբ միավորվեցին մշակույթի, սպորտի, կրթության նախարարությունները, պարզ էր, որ ազգային ինքնության և պետականության համատեքստում չի գիտակցվում և չի կարևորվում  մշակույթի դերակատարությունը, բայց դա բոլորովին էլ  պատահականություն չէր»,- նշեց նա։

Լ. Գալստյանի խոսքով, ազգային շատ արժեքների և ինստիտուտների կողքին հենց  գիտակցաբար էր թիրախավորվել մշակույթը, թիրախավորվել էր, որովհետև նրանց ինքնություն և ամուր ողնաշար ունեցող քաղաքացի պետք չէր. «Նրանք եկել էին թուլացնելու մեր դիմադրողականությունն ու խոցելի դարձնելու ազգային պետությունը։ Համոզված հայտարարում եմ, որ այս կարճամիտ  վերաբերմունքը հետևում է մնալու, քանի որ իշխանության է գալու մի թիմ, որն ունի մշակույթի դերի համակողմանի արժևորում, պատրաստվում է  այն հանրային գիտակցության անբաժանելի մասը դարձնել»։

Լ. Գալստյանը նշեց, որ մեր հասարակության մեջ տիրող արժեքային խորը ճգնաժամը հաղթահարելու և Հայաստանի քաղաքացի ձևավորելու կենսական հենարաններից մեկը մշակույթն է, մեր լեզվի և հավատի հետ մեկտեղ մեր ինքնության հիմնական հենասյունն է մշակույթը՝ այն դեմքը, որով աշխարհը ճանաչել է հային և այսուհետ  շարունակելու է ճանաչել մեզ։

«Մեր թիմի կողմից իրականացվող մշակութային քաղաքականությունը սահմանում է  կոնկրետ նպատակներ, և մենք գիտենք՝ ինչպես հասնել դրանց։ Այդ քաղաքականությունը  պատասխանելու է մեր հասարակության առջև կանգնած կարևորագույն խնդիրների՝ ինչ երկիր ենք կառուցում,  ով է նրա քաղաքացին, ուր ենք գնում։ Այդ քաղաքականությունը կենսունակ է լինելու ամենուր՝ հանրակրթության, մասսայական  լրատվության, ճարտարապետության, քաղաքաշինության, արտաքին քաղաքականության մեջ և առհասարակ մեր հոգևոր  առողջացման և երկրի սոցիալ-տնտեսական  փոփոխությունների համատեքստում»,- ասաց նա։

Լ. Գալստյանը նշեց, որ տարիներ շարունակ մշակույթը կրել է թերֆինանսավորման կնիքը. «Իբրև  ռազմավարական առաջնահերթ ոլորտ՝ մենք մերժում ենք մշակույթի ֆինանսավորման մնացորդային մոդելը, անցնելու ենք առաջանցիկ ֆինանսավորման։ Հասնելու ենք նրան, որ ստեղծագործ, տաղանդավոր հայ մարդն ունենա հայրենիքում ստեղծագործելու և պետության աջակցությունը ստանալու բոլոր հնարավորությունները»,- նշեց «Հայաստան» դաշինքի ներկայացուցիչը։

Նա հայտարարեց, որ մշակութային կապիտալի հաշվարկով որդեգրելու են ոլորտի զարգացման  բեկումային ծրագիր՝ «Հայաստան-2026»։

«Ազգայինի նկատմամբ ակնածանք ձևավորող շարունակական ծրագրերով կանխվելու են  մեր ինքնության  սպառնացող վտանգները, հաղթահարելու ենք հոգևոր սովը՝ աղքատությունը։ Բարձրացվելու են գեղարվեստական կրթության մակարդակն ու հասանելիությունը, մշակվելու են  գեղարվեստական կրթության նոր չափորոշիչներ, արդյունավորվելու է  Սփյուռքի ներուժը, մեծանալու է նրա մասնակցությունը մեր մշակութային կյանքում, աջակցություն է ցուցաբերվելու սփյուռքյան ազգային մշակութային կառույցներին։

Բարելավվելու է ոլորտի օրենսդրությունը, ինչը հնարավորություն կտա  առավելագույս պաշտպանել պատմամշակութային անշարժ հուշարձանները, զարգացնել թանգարանային գործը, գրադարաններն ու ժամանակակից արվեստը։ Արդիականացնելու ենք թանգարանները։

Որդեգրվելու է  պետության կողմից պաշտպանվող պատմության և մշակույթի հուշարձանների պահպանման,  արժևորման, հանրահռչակման նոր չափանիշներ։ Պետությունը խրախուսելու և աջակցելու է ոչ պետական մշակութային կոլեկտիվներին, ստեղծագործող անհատներին»,- իրենց անելիքները թվարկեց Լ. Գալստյանը։

Նա ընդգծեց՝ մշակույթը մեր ամենամրցունակ բրենդն է, միջազգային երկխոսության անսպառ ռեսուրս. «Սրանով պայմանավորված կմշակվեն հայկական մշակութային  արտադրանքի արտահանման, միջազգայնացման, արվեստի շուկաներում նոր մեխանիզմներ և նոր քարտեզներ, ինչը հնարավորություն կտա միջազգային հարթակներում ապահովել ՀՀ արժանապատիվ ներկայությունը։

Մենք բարձրացնելու ենք մշակութային և ինտելեկտուալ  էլիտարների հետ պետության և հասարակության երկխոսության մակարդակը, հայ մտավորականի և մշակույթի գործչի ձայնը պետք է արժևորվի և լսելի լինի։ Մենք մշակելու ենք անձեռնմխելի կապիտալով ֆոնդերի օրենսդրությունը, ինչը թույլ կտա  շահութահարկի միչև 5 տոկոսը փոխանցել մշակութային հիմնադրամներին, խթանել ներդրումները»։

Լիլիթ Գալստյանը հայտարարեց, որ մշակույթի ոլորտում իրենց ստանձնած  պարտականություններն ու ծրագրերը կյանքի կոչելու համար կառավարության կազմում վերականգնելու են մշակույթի նախարարությունը։