Ձեր վստահելի աղբյուրը

«Հայաստանի ու Արցախի վերքերը չեն լավանում ու չեն լավանալու, չեն սպինալու  այնքան ժամանակ, որքան Նիկոլ Փաշինյանն իշխանության է»,- ասուլիսում ասաց  ՀՀԿ փոխնախագահ Արմեն Աշոտյանը։

Նա նշեց, որ Նիկոլ Փաշինյանն ու իր ոհմակը թաքցնում է զոհվածների իրական թիվը, նրանց մարմինները, մասունքները:

«Երբ պատերազմի ժամանակ ես զորակոչվեցի բանակ, իսկ ես մասնագիտությամբ դատական բժիշկ եմ, ենթադրվում էր, որ ես պետք է գնամ ու մասնակցեմ դիահերձման աշխատանքներին, օգնեմ, բայց ինձ չտարան այնտեղ այն նույն պատճառով, ինչ այսօր անհետ կորածների ծնողները բողոքում ու մեղադրում են Նիկոլին։ Արդեն պատերազմի 4-րդ, 5-րդ օրը գիտեի, որ բազմաթիվ զոհեր կան, մարմինները պահվում են «Սպայկայի» սառնարաններում»,- ասաց Ա. Աշոտյանը:

Նա նշեց, որ այս ցավը կարող է բուժվել այն դեպքում, երբ Նիկոլ Փաշինյանը քաղաքականապես ոչնչացվի։

«Փաշինյանի՝ վերջին երկու օրերի ագրեսիվ պահվածքը վկայում է այն մասին, որ նա անցել է վա բանկ, Ալիևից երաշխիքներ է ստացել, որ սահմանի վրա նոր մեծ միջադեպեր չեն լինելու մինչև ընտրարշավ»,- ասաց ՀՀԿ փոխնախագահը։

Ա. Աշոտյանը կարծում է, Փաշինայնն արդեն մի բան տորագրել է:

«Այն փաստը, որ նա թողել է մեր երկրի պրոբլեմները,  ռազմագերիներին  ու մարզերում հայալեզու, բայց թուրքական քարոզչություն է իրականացնում, վկայում է այն մասին, որ իր թիկունքն ամուր է, իսկ իր թիկունքը վաղուց Ադրբեջանի ժողովուրդն է, ոչ թե հայ»,-ասաց քաղաքական գործիչը։

ՀՀԿ փոխնախագահի խոսքով, եթե հունիսի 20-ին Փաշինյանն իրեն հռչակի հաղթող և մարսի դա, ապա կստացվի, որ հայ ժողովուրդը պատմության մեջ  ոչ միայն պետականության, այլև գենի իրավունք չունի։

«Եթե մենք մինչև հունիսի 20-ը չենք կարողացել վերացնել Նիկոլի քաղաքական գոյությունը, ուրեմն՝ հունիսի 20-ը վերածում ենք Նիկոլի գնդակահարության գործընթացի՝ քվեաթերթիկներով: Կարևորը՝  հունիս 20-ին քվերաթերթիկով գնում ենք ու քաղաքական գնդակահարության ենթարկում Նիկոլ Փաշինյանին»,- ասաց նա:

Նրա խոսքով, Փաշինյանը հպարտ է, որ Հայաստանում 5000 հարսանիքի փոխարեն 5000 թաղում է եղել:

«Ես հույս ունեի, որ Նիկոլի երեկվա՝ «հպարտանում եմ պարտությունից» հայտարարությունից հետո «Քաղաքացիական պայմանագրի» ցուցակից մի քանիսը կասեին՝  սրա հետ  հետ ճանապարհ չունենք անցնելու: Իրականում ՔՊ ցուցակը «Էնի Ադրբեջանի» Հայաստանի մասնաճյուղի ցուցակ է։

Մենք պետք է մաքրենք մեր անցյալը և  պատերազմի մասին ճշմնարտությունն իմանալով՝ գնալ առաջ»,- ասաց Ա. Աշոտյանը:

Ըստ ՀՀԿ փոխնախագահի, որ Հայաստանը պետք է կարգի բերեն, որ Արցախը փրկեն. «Արցախի դիսկուրսը օրակարգից գրեթե դուրս է եկել։ Արցախը չի կարող երկար ժամանակ մենակ այդ բաց աշխարհաքաղաքական ծովում լող տալ: Մենք պետք է օր առաջ ձեռք մեկնենք, որ փրկենք մեր կրտսեր եղբորը»:

«Պատիվ ունեմ» նախընտրական դաշինքի մասին խոսելիս, որի  կազմում ՀՀԿ-ն ու «Հայրենիք» կուսակցությունն է, Արմեն Աշոտյանն ասաց․ «Ես գիտեմ, որ մեր վարկանիշն աճում է: Մենք այսօր առնվազն 3-րդն ենք, իսկ մեր քաղաքական դաշինքի հավակնությունները շատ ավելի մեծ են»: