Ձեր վստահելի աղբյուրը

«Դուք հասկանում եք՝ իրենց կողմից նշանակված ԱԳ նախարար Արա Այվազյանը, որը հրաժարական է ներկայացնում՝ ասելով, որ այս իշխանությունները Հայաստանի շահերին դեմ են գնում, ինչ ազդակ է»,- ԿԸՀ-ում լրագրողների հետ զրույցում ասաց «Հայաստան» դաշինքի նախընտրական կենտրոնական շտաբի պաշտոնական ներկայացուցիչ Արամ Վարդևանյանը:

Նրա խոսքով, «Հայաստան» դաշինքը հայտարարել է, որ այս ժամանակավոր իշխանության ցանկացած գործողություն հաստատ Հայաստանի շահերը չէ, որ պաշտպանում է կամ որևէ կերպ փորձում է ներկայացնել:

«Իսկապես, ապշելու երևույթ է, չեք գտնի մի երկիր, որտեղ արտաքին գործերի նախարարը հրաժարական ներկայացնելով՝ պատճաբանություն է ներկայացնում հենց նման  հանգամանքը, որ իշխանությունները, պարզ է, չէ, խոսքը  վարչապետի պաշտոնը ամեն կերպ դեռևս զբաղեցնող անձի արարքների մասին է:

Սա պետք է նաև մեր հանրության համար ազդակ լինի: Սրա մասին բազմաթիվ անգամներ են հիմնավոր հայտարարություններ ներկայացվել, սա հերթականներից մեկն է:

Կարծում եմ՝ կարելի էր դրա մասին շատ ավելի շուտ ահազանգել: Ուրեմն  ինչ-որ  պրոցեսներ միգուցե այնպիսի իրավիճակի են հասել,  որ նույնիսկ նախարարը չի կարողացել այլ ելք գտնել, քան հրաժարականը»,- ասաց Ա. Վարդանյանը:

Նրա խոսքով, չափազանց վատ է, որ նման դրության մեջ ենք հայտնվել, բայց  «Հայաստան» դաշինքի ծրագրային կարևորագույն դրույթներից մեկն այն է, որ այս վիճակում այլևս երբեք ՀՀ-ն չհայտնվի:

«Նոյեմբերի 9-ի փաստաթղթով ռազմագերիների հարցը մինչ օրս լուծված չէ, բայց հայրենիք հողերը հանձնելու մասը շատ հստակ իրականացվում է: Ինչպե՞ս է ստացվում՝ անձը, որը նոյեմբերի 9-ի եռակողմ հայտարարության կատարման երաշխավորն է, նման կերպ է առաջնորդվում: Խոսել նրա մասին, որ նա որևէ կերպ մտածում է Հայաստանի շահերի մասին, աբսուրդ է»,-ասաց Վարդևանյանը:

Պատասխանելով հարցին, թե Փաշինյանը ՀՀ առաջաին և երկրորդ նախագահներին բանավեճի առաջարկ է արել, Արամ Վարդևանյանն ասաց. «Ներկայացնեմ իմ կարծիքը որպես «Հայաստան» դաշինքի նախընտրական կենտրոնական շտաբի պաշտոնական ներկայացուցիչ.  Հայաստանի երկրորդ նախագահը, Արցախի առաջին նախագահը, նախագահ, որն ազատագրել է հողեր, չպետք է որևէ մի  իրավիճակում բանավեճի մեջ գտնվի մի անձի հետ, որը հողեր հանձնող է, մի մարդու հետ, որին, նույնիսկ իր նշանակած նախարարն ասում է՝ հաշվի չի առնում Հայաստանի շահերը:

Հայաստանի շահերը հաշվի չառնողը Հայաստանի շահերի դեմ գնացողն է: Նման անձի հետ բանավիճելու իմաստ, նպատակահարամարություն առհասարակ չեմ տեսնում»: