Ձեր վստահելի աղբյուրը

Առաջիկա արտահերթ ընտրությունները, որը ենթադրում է պայքար, մրցակցություն, քաղաքական ուժերի միջև, վտանգում է Հայաստանի միասնականությանը։ Արտաշատում մարզային հերթական այցելության շրջանակում կուսակցության ակտիվի հետ հանդիպմանը նման կարծիք հայտնեց «Հանուն սոցիալական արդարության» կուսակցության նախագահ Արման Ղուկասյանը, որ պատերազմում կրած պարտությունից հետո անհրաժեշտ էր համարում  արտահերթ ընտրությունների անցկացումը։

Նաև այդ պատճառով ՀԱՍԱԿ-ը որոշել է չմասնակցել այս ընտրություններին։

«Մենք ասում էինք, Հայաստանի ճակատագիրը պետք է որոշի յուրաքանչյուր քաղաքացի, և ոչ թե էլիտար նեղ ինչ-որ խմբեր փակ դռների ետևում: Բայց իրավիճակը սահմաններին, տարածաշրջանում, առհասարակ Հայաստանի շուրջ բերեց մի իրավիճակի, երբ քաղաքական ուժերը մտան միմյանց դեմ պայքարի մեջ, մինչդեռ այս օրհասական պահին օրակարգային է կոնսոլիդացումն ու միասնականությունը: Իսկ ընտրապայքարը չի կարող ապահովել միասնականություն, օրեցօր խորացող պառակտումը տեսանելի է  լինելու, ինչից էլ օգտվում է թշնամին»,- ասաց նա:

Ղուկասյանն այսօր  առաջնահերթ է համարում  անվտանգային հարցերի լուծումը։

«Մեր քաղաքական ուժը որոշում է կայացրել չմասնակցել արտահերթ ընտրություններին, բայց դա չի նշանակում, որ մենք դուրս ենք մնում քաղաքական գործընթացներից: Հակառակը՝ ՀԱՍԱԿ-ը տեսնում է իր դերը անհրաժեշտ կոնսոլիդացիայի ապահովման գործում, ինչպես նաև պատրաստվելու է հետագա քաղաքական գործընթացներին»,- ասաց նա:

Ամփոփելով խոսքը՝  Ղուկասյանը նշեց, այսօր շատ կարևոր ժամանակահատված է Հայաստանի համար, քանի որ կա՛մ ճգնաժամը խորանալու է, և երկիրը հայտնվելու է էլ ավելի անկանխատեսելի հետևանքների առջև, կա՛մ պետք է միասնական լինենք և կատարենք ճիշտ ընտրություն:  Նա հույս ունի,  որ ժողովուրդը խոհեմ որոշում կկայացնի, իսկ քաղաքական ուժերը չեն առաջնորդվի սեփական շահերով ու ամբիցիաներով։

«Մենք շարունակելու ենք մեր այցերը մարզերում, մարդկանց հետ հանդիպումների արդյունքում փորձելու ենք հասկանալ, թե ինչպես կարող ենք երկրում բարենպաստ պայմաններ ձևավորել»,-ասաց Ա. Ղուկասյանը։

Կուսակցության փոխնախագահ Ծովինար Կոստանյանը, որ ներկա էր հանդիպմանը, նշեց՝ իրենց քաղաքական ուժը շուտով կդառնա հինգ տարեկան, սակայն իրենց  մասնակցությունն ընտրություններին ինքնանպատակ չեն համարում։ Մինչ մյուս ուժերը պատրաստվում են ընտրություններին, իրենք ծանոթանում են մարզերի բնակիչների խնդիրներին։

«Մենք չենք գործում ընտրությունից ընտրություն։ Քաղաքական ուժը պետք է ավելի հեռուն նայի ու պայքարի գաղափարների, այլ ոչ թե խորհրդարանում հայտնվելու համար: Մինչդեռ այսօր տեսնում ենք, որ արտահերթ ընտրություններին մասնակցելու հայտ ներկայացրած ուժերից շատերն ընդամենը մի քանի ամսվա կյանք ունեն»,-նշեց նա։

Կոստանյանի խոսքվ, ՀԱՍԱԿ-ը բացի սոցիալական արդարության կարևորումը, մշտապես բարձրաձայնում է ազգային արժեքների պահպանության հարցը։

«Որպեսզի մենք կարողանանք պահպանել մեր պետությունն ու անկախությունը, առաջին հերթին մենք ինքներս պետք է պահպանենք մեր դիմագիծն ու ազգային արժեքները: Այսօր հատկապես կարևոր է հասկանալ, որ դրսից միլիոնավոր դոլարներ են ուղղվում մեր արժեքների ոչնչացմանը։  Մենք պետք է պայքարենք այդ երևույթի դեմ»,-ասաց նա: