Ձեր վստահելի աղբյուրը

«Փայտասար, կամ Օդունդաղ գագաթը համարվում էր խորհրդային Հայաստանի և Արբեջանի վարչական սահմանը, նրա ներքևով անցնող խրամատային Ճանապարհն ամբողջությամբ անցնում է Հայաստանի սուվերեն տարածքով, բայց ներկայում Ադրբեջանի վերահսկողության տակ է»,-Տավուշի մարզ այցով գտնվող լրագրողներին հայտնեց Հայկական ճարտարապետությունն ուսումնասիրող հիմնադրամի լուսանկարիչ Սասուն Դանիելյանը՝ նկարագրելով Ջողազի ջրամբարի հարակից շփման գծի առանձնահատկությունները:

Նրա խոսքով  Ջողազի ջրամբարի հարևանությամբ գտնվող Բերքաբեր գյուղի ոռոգման համար նախատեսված ջրերի 70-80 %-ը գտնվում է Ադրբեջանի հսկողության տակ:

Սասուն Դանիելյանը տեղեկացրեց, որ ջողազի ջրամբարի հարևանությամբ գտնվող Գավազան լեռան վրա կառուցված հին բերդի տակ պահպանված են հայկական խաչքարերով գերեզմաններ:

«Ադրբեջանցիներն ապակեպատելով մի քանի խաչքարեր՝ փորձել են դրանք ներկայացնել, որպես օղուզական գերեզմանոց, իսկ լեռան հյուսիսային լանջերին լավ պահպանված են ամրոցի պարիսպները»,- հայտնեց տավուշցի լուսանկարիչը:

Նրա խոսքով Բերքաբերի ջրամբարից  ներկայում ոչ մի գյուղ չի օգտվում, թեև ժամանակին նրանով 7-8 գյուղի դաշտեր են ջրվել:

Դանիելյանը տեղեկացրեց, որ Բերքաբերի ջրամբարն ամբողջությամբ կառուցված է ՀՀ տարածքում, սակայն ներկայում հիմնականում Հայաստանի վերահսկողության ներքո չէ: