Ձեր վստահելի աղբյուրը

ՊԵԿ նախագահ Էդվարդ Հովհաննիսյանը տեղեկություն չունի, թե Մեղրիի մաքսային պահեստներում հայտնաբերված թերությունները վերացվել են, թե ոչ։ Այդ մասին նա հայտարարեց ԱԺ-ում կազմակերպված ճեպազրույցի ժամանակ՝ պատասխանելով մաքսային պահեստների գործունեության դադարեցման մասին լրագրողի հարցին, և խորհուրդ տվեց այդ հարցով դիմել տնտեսվարողին։

Նա հայտնեց, որ ընդամենը տեղյակ է՝ տնտեսվարողը ՊԵԿ որոշման ակտը բողոքարկել է դատարանում։

Լրագրողի մեկ այլ հարցին, թե տեղեկություններ կան, որ գործարար Խաչատուր Սուքիասյանը Մեղրիում նոր մաքսային տերմինալներ է կառուցում՝ Էդվարդ Հովհաննիսյանը հայտնեց, որ ինքը նման տեղեկություններ չունի։

«Այդպիսի ընթացկարգ չկա, որ մեզ պետք է դիմեն, նոր միայն տերմինալ կառուցեն։ Հնարավոր է նախաձեռնեն կառուցումը և վերջում դիմեն թույլտվություն ստանալու համար»,- հայտարարեց ՊԵԿ նախագահը։

Էդվարդ Հովհաննիսյանը հայտարարեց, որ միանշանակ մասնակցելու է ընտրություններին և իր ձայնը տալու է գործող իշխանություններին, իսկ այդ մասին լրագրողի հարցն ավելորդ համարեց։

ՊԵԿ նախագահը նաև հայտնեց, որ զբոսաշրջությունը և նրա հետ կապված մյուս ծառայությունները համավարակի պատճառով դեռևս չեն վերականգնվել, իսկ բիզնեսի մյուս ոլորտները հիմնականում գործում են։