Ձեր վստահելի աղբյուրը

«Անհապաղ հրաժարական», «Մեղավոր ես, հատուցիր», «Դուք մա՞րդ եք»… Նմանատիպ  գրությամբ պաստառներով մի խումբ դաշնակցական երիտասարդներ բողոքի ակցիա են անում  առողջապահության նախարարության մոտ։ Նրանք պահանջում են հանդիպում առողջապահության նախարարի պաշտոնակատար  Անահիտ Ավանեսյանի հետ, պահանջում են նրա հրաժարականը։

«Պատահական հայտնի դարձավ, որ տասնյակ մեր զոհված եղբայրների մարմիններ պահվում են պարզապես սահմռկեցուցիչ պայմաններում: Յուրաքանչյուր  գիտակից մարդ, անկախ ազգությունից, տեսնելով հայ զինվորը, հայրենիք համար իր կյանքը տված զինվորն ինչ  ճակատագրի է արժանացել պետության կողմից, միանշանակ չի կարող խելամիտ արձագանք տալ դրան:  Տեսնելով այդ պատկերը՝ գժվելու աստիճանի կարելի է հասնել: Սա այն պետության պատկերն է, որն  այս իշխանությունը կարողացել է  դարձնել Հայաստանը»,- նախարարության դիմաց հայտարարեց ակցիայի մասնակից երիտասարդը:

Նշում են՝ բացարձակապես նպատակ չունեն մեղադրելու միայն առողջապահության նախարարի պաշտոնակատարին, հասկանում են՝ սա այս իշխող համակարգի ընդամենը մեկ դետալն է, նմանատիպ տարբեր երևույթներով ապացուցել են, որ մարդկային ոչինչ չունեն իրենց մեջ:

«Հստակ պահանջում ենք՝ նախարարի պաշտոնակատարը գա այստեղ, նրան հստակ փոխանցելու ենք՝ անգամ այն 19-20 օրը, որը մնացել է նրանց իշխանությանը, որից հետո միանշանակ չեն լինելու, բարոյական, մարդկային որևէ իրավունք չունի շարունակել իր «գործունեությունը»»,- նշեց ակցիային մասնակիցը:

Երիտասարդներն ասում են՝  հստակ է այս իշխանությունների անհայրենիք լինելը, այս իշխանությունների գործելաոճը:

«Կպել են բոլորիս ինքնասիրությանը, ազգային արժանապատվությանը, ցավալի է, որ մեր երկրում նման երևույթներ են տեղի են ունենում»,- ասում են երիտասարդները:

Նրանք զարմանում են, թե ինչպես կարելի է այսքանից հետո նայել զոհված զինծառայողների ծնողների աչքերին ու ասել՝ ապագա կա:

«Ո՞նց կարելի է ձեզ հետ ապագա ունենալ»,- ասում են երիտասարդները:

«Երբ Նիկոլ Փաշինյանը գնում էր քարոզարշավ անելու, դրա փոխարեն պիտի փակ դռներից այն կողմ 24 ժամյա ռեժիմով նախարարին կանչեր ու հրամայեր, որ զբաղվեն մեր տղերքի դիերն իրենց ծնողներին շուտափույթ հանձնելով ու արժանապատիվ հուղարկավորություն կազմակերպելով: Սակայն նրանք Նիկոլ Փաշինյանի գլխավորությամբ ցույց են տալիս, որ անհայրենիք տականք են, հող հանձնող մարդ է, հայ զինվորի, հայկական սահմանը պահողի քրտինքը չգնահատող մարդ է ու  այսօր այդ ամենը Նիկոլ Փաշինյանը թողնում է այս նախարարի վզին: Այս նախարարը գործիք է, ինչպես գործիք են իր բոլոր ուսապարկերը»,-ասաց ակցիայի մեկ այլ մասնակից:

Նրանք տոպրակներ նետեցին նախարարության մուտքի դիմաց՝ նշելով, որ հենց նրան են արժանի այս տոպրակներին, ոչ թե հերոս տղաները: 

Երիտասարդների և ոստիկանների միջև քաշքշոց եղավ:

«Անհայրենիք ոստիկաններ եք»,- բղավում են ակցիայի մասնակիցները: 

«Մենք խաղաղ ակցիա էինք անում, երևի նիկոլականները ջղաձգվեցին և հրաման տվեցին մի քանի հոգի տանելու: Ոնց խաղաղ եկել ենք, խաղաղ գնում ենք՝ անելու մեր արձանագրումները»,- ասացին երիտասարդներն ու հեռացան նախարարության մոտից, սակայն նորից քաշքշոց սկսվեց, կրկին քաղաքացիների բերման ենթարկեցին: