Ձեր վստահելի աղբյուրը

Եվրոպական խորհրդի նախագահ Շառլ Միշելը նախօրեին Ադրբեջանի նախագահ Ալիևի հետ հեռախոսազրույցում և Հայաստանի վարչապետի պաշտոնակատար Փաշինյանի հետ հանդիպմանը շեշտել է Հարավային Կովկասի կայունության և բարգավաճման ու երկու գործընկեր երկրների հետ հարաբերությունների խորացման կարևորությունը ԵՄ-ի համար:

Տարածված հաղորդագրության մեջ ասվում է, որ Միշելը հիշեցրել է, որ Ադրբեջանի և Հայաստանի կողմից 2020 թ. նոյեմբերի 9-ին հրադադարի մասին հայտարարության ամբողջական կատարումը կարևոր է տարածաշրջանային անվտանգության և կայունության համար:

ԵՄ-ն պատրաստ է փորձագիտական աջակցություն տրամադրել սահմանների սահմանազատման և սահմանագծման վերաբերյալ և նպաստել վստահության ամրապնդմանը:

Եվրամիությունը նաև խրախուսում է երկու կողմերին՝ շտապ համագործակցել ձերբակալվածների վերադարձի, ականների դաշտերի և այլ կարևոր հումանիտար հարցերի շուրջ:

Ասվում է, որ ԵՄ-ն տրամադրում է գրեթե 20 միլիոն եվրո մարդասիրական օգնություն և կշարունակի ներգրավվել:

«Այս անմիջական մարտահրավերների լուծումը, սակայն, միայն առաջին քայլն է դեպի կայուն խաղաղ կարգավորում: ԵՄ խորհրդի նախագահը երկու կողմերին էլ կոչ արեց վերսկսել բանակցությունները՝ կառուցողական ոգով:

Եվրամիությունը խորը հետաքրքրություն ունի Հարավային Կովկասի տարածաշրջանի անվտանգության, կայունության և բարգավաճման մեջ՝ որպես ԵՄ Արևելյան գործընկերության բաղկացուցիչ մաս»,-ասվում է ԵՄ հաղորդագրության մեջ։