Ձեր վստահելի աղբյուրը

«Ինչ-որ մեկը խոսում է բանակաշինությունից, նայում տեսնում ես, որ բանակից փախած մարդ է, ինչ-որ մեկը հակառուսական տրամադրություններ տարածելով փորձում է ձայներ հավաքել՝ վտանգելով երկրի անվտանգությունը»,- հայտարարեց «Լուսավոր Հայաստան» խմբակցության ղեկավար Էդմոն Մարուքյանը՝ նկարագրելով փաստացի սկսված ընտրարշավը:

Շարունակելով խոսքը՝ պատգամավորը շեշտեց, որ դատական իշխանության վերականգնման մասին խոսում են այն ապականողները, իսկ թալանից՝ թալանչիները:

Նա կարծիք հայտնեց, որ ընտրությունների մեջ մտածները շարունակում են հարաբերություններ պարզել, իսկ այդ ընթացքում ադրբեջանցիները մտել են ՀՀ սահմանից ներս, հետևաբար՝ երկիրը ներքին հարցերը պարզելու ռեսուրս չունի:

«Ռոբերտ Քոչարյանն այսօր հայտարարել է, որ Փաշինյանը ոչ մի խոստում չի կատարել, խոսք էր տվել ինձ դատել, բայց չի դատել: Պատկերացնո՞ւմ եք իրավիճակի սյուռեալիզմը»,- հայտարարեց Մարուքյանը և դիմելով «Իմ քայլը» խմբակցությանը հորդորեց. «Ժողովո՛ւրդ, հասկանում եք իրավիճակը, մի բան արե՛ք, գնացե՛ք, ինքնաբացարկ տվե՛ք, հանե՛ք ՔՊ-ն ընտրապայքարից»:

Մարուքյանը շեշտեց, որ հունիսի 21-ին պետք է վերականգնվի համերաշխությունը, իսկ դրա համար, ըստ նրա, 40% դեռ չկողմնորոշված ժողովուրդը պետք է իր ձայնը տա «Լուսավոր Հայաստանին»: