Ձեր վստահելի աղբյուրը

«2020 թվականի սեպտեմբերի 27-ից մինչև օրս 3500-ից ավելի դիակի և դիակի մասունքների  փորձաքննություն է կատարվել մեր հիմնարկի կողմից»,- ասուլիսում այս տվյալը հայտնեց Հանրապետական դատաբժշկական կենտրոնի Արարատի մարզի դատաբժշկական փորձաքննությունների բաժնի վարիչ Արմեն Գևորգյանը:

Նա հայտնեց, որ իրենք իրականացրել են բարդագույն փորձաքննություններ, քանի որ սովորական դիակների փորձաքննություններ չէին՝ դիակները ամբողջովին մասնատված, նեխային կազմափոխման ենթարկված վիճակում էին:

Ա. Գևորգյանի խոսեց այն մասին, որ պատերազմական իրավիճակը նախատեսում է ոչ ստանդարտ աշխատելաոճ ցանակացած բնագավառի համար, որ աշխարհի որևէ առաջադեմ երկիր  պատրաստ չէ, նույն դատաբժշկական փորձաքննությունների ասպարեզում, իրագործել իր օրական նորմավորված  փորձաքննություններից տասնյակ, հարյուրավոր անգամ ավելի փորձաքննություն.

«Մենք պատերազմի առաջին իսկ օրվանից ձեռնարկեցինք սառնարանային համակարգերի առկայության խնդրի լուծում: Գորիսում, Արմավիրում, Ստեփանակերտում, Մարտունիում մեր հիմնարկի  պահանջով  պաշտպանության նախարարության կողմից տրվեցին սառնարային շարժական համակարգեր»:

Գևորգյանը պատմեց, որ զինվորների այդ քանակությամբ դիերը պահպանելու խնդիրը լուծելու համար իր նախաձեռնությամբ Արտաշատում վերցրել են սառնարաններ, որոնք նախատեսված են եղել մրգի պահպանման համար։ Այստեղ բանախոսը հպարտորեն հավատացրեց՝ դրանք եվրոպական ամենավերջին ստանդարտներին համապատասխան սառնարային համակարգեր են եղել

Գալով առանձին քննարկումներին, նա հայտարարեց, որ իրենք գործ չեն ունեցել «թարմ, նոր դիակների» հետ. «Գործ ենք ունեցել ռազմի դաշտում թողնված, արևի,  կենդանիների կողմից քայքայման ենթարկված դիակների հետ, հուղարկավորված և արտաշիրիմված դիակների հետ:

Մենք ունեցել ենք թարմ դիակներ միայն պատերազմի առաջին 1-2 օրը, դրանից հետո մենք ոչ մի թարմ դիակի հետ ընդհանրապես չենք առնչվել: Մեզ մոտ բերված դիակները ծայրահեղ աստիճանի նեխման, կազմափոխման, փափուկ հյուսվածների մեծ մասի ու ներքին օրգանների բացակայության, ամբողջովին որդերի թրթուրներով պատված վիճակում էին»:

Ա. Գևորգյանի խոսքով, դիակների նորմալ պահպանման ջերմաստիճանը 2-6 աստիճան է, այնինչ
դրանց մեծ մասը եղել են անճանաչելի. «Այդ զինվորների դիակները որևէ մշակման ենթակա չեն. քանի դեռ տվյալ դիակից չենք կարողացել վերջնական անջատել գենետիկ նյութը, քիմիական նյութով այդ դիակի վրա ազդելու իրավունքը չունենք:

Մեզ մոտ դիակը չի ենթարկվել նեխման: Պատկերացրեք՝ առանց դագաղ  հուղարկավորված դիակ, այսինքն  հողի մեջ եղած ամբողջ ագրեսիվ նյութերը, ագրեսիվ  միջատներն իրենց գործն արել են  հողի մեջ տվյալ դիակի հետ»: