Ձեր վստահելի աղբյուրը

«Չորս ամսում 80 հազար քաղաքացի մեր երկրից մեկնել է, նման ցուցանիշ չի արձանագրվել վերջին 25 տարվա ընթացքում, սա ահազանգ է, և մենք բոլորս ինչ-որ բան պետք է անենք»,- Սյունիքի մարզի Ագարակ համայնքի բնակիչների հետ «Հայաստան» դաշինքի հանդիպման ժամանակ հայտարարեց ՀՀ երկրորդ նախագահ, դաշինքի առաջնորդ Ռոբերտ Քոչարյանը:

Նրա խոսքով, մինչ այս քաղաքացիների հետ բազմաթիվ հանդիպումների արդյունքում վեր է հանվել  ժողովրդին հուզող երկու հիմնական հիմնախնդիր

«Առաջինը անվտանգությունն է իր բազմաթիվ բաղադրիչներով։ Այսօր սահմաններն անպաշտպան են, բանակի ողնաշարը ջարդված է, նույնիսկ երկրի ներսում անվտանգ չէ, քանի որ կա հանցագործությունների էական և շեշտակի աճ։ Իսկ երկրորդ խնդիրը տնտեսական է»,- հայտարարեց Ռոբերտ Քոչարյանը և հավելեց, որ տնտեսությունը գահավիժում է, արձանագրվել է խորը անկում, գործազրկության աճ, աղքատության շեշտակի աճ, որից բխում է արտագաղթի տագնապալի աճը։

«Հայաստան» դաշինիքի առաջնորդը նշեց, պետք է հեռացնալ այն մարդկանց, որոնք երկիրը հասցրել են այս վիճակին, ու պետք է ընտրել այն ուժին, որը կարող է երկիրը դուրս բերել փոսից, հանել ճգնաժամից։

«Մենք առաջարկում ենք մեզ։ Հասկանում ենք, որ կան քաղաքական այլ ուժեր, նոր, հին, նաև բավականին էկզոտիկ ուժեր, բայց դուք եք ընտրելու։ Մնեք դիմում ենք ձեզ և ասում, մենք այն թիմն ենք, որ ունենք փորձ, գիտելիքներ, ապացուցել է, որ կարող է իրավիճակ փոխել։ Եթե դուք ձեր քվեն տաք մեզ, ապա վստահ եղեք, որ գնալու ենք դեպքի ուժեղ Հայաստան։ Այդ շրջադարձը ձեզանից ամեն մեկի ձեռքում է»,- ասաց ՀՀ երկրորդ նախագահն ու հորդորեց, հունիսի 20-ին վճռական գնալ տեղամաս ու ընտրել թիվ 24 քվեաթերթիկը։

Ի դեպ, Ռոբերտ Քոչարյանը նկատեց, թիվն էլ խորհրդանշական է, քանի որ իրենք պատրաստվում են աշխատել օրը 24 ժամ։

«Հայաստան» դաշինքի առաջնորդն իր նախաձեռնությամբ անդրադարձավ շահարկվող այն հայտարարություններին, թե Քոչարյանը պատրաստվում էր հանձնել Մեղրին։

«Մի հավատացեք բացարձակ ստերին։ Հայրենիքի հողը հանձնողն այս իշխանությունն է. որը իշխանության գալուց անմիջապես հետո սկսել է հետևողականորեն քայքայել մեր երկրի ողնաշարը՝ հայկական բանակը։ Արդյունքում ունեցանք տարածքային մեծ կորուստներ, այսօր ինձ քննադատողները խոսում են Մեղրիի միջանցքի մասին»,- ասաց նա։

ՀՀ երկրորդ նախագահն ասաց՝ կողմ է կոմունիկացիաների բացմանը։

«Բայց ինձ մտահոգում է միջանցք բառը, որովհետև ես գիտեմ, թե ինչ են Թուրքիան ու Ադրբեջանը հասկանում ու պատկերացնում միջանցք ասելով։ Սա այն ահազանգն է, որ պետք է ասենք՝ ստոպ, մի հատ եկեք, հասկանանք, թե դուք ինչ ի նկատի ունեք միջանցք ասելով։ Իրենց պատկերացմամբ, դա նշանակում է Հայաստանի սուվերենության սահմանափակում այդ միջանցքի վրա, իրենց ազդեցության լծակների սահմանում, սա անընդունելի է»,- նշեց Ռոբերտ Քոչարյանը՝ ավելացնելով, որ այս հարցում Թուրքիան ու Ադրբեջանն ունեն հեռահար նպատակներ, որոնք լրջագույն անվտանգային խնդիրներ են առաջացնելու Հայաստանի համար։

Քոչարյանն ասաց՝ անելու են, ինչ խոստանում են, անելու են ժամանակացույցի համաձայն, ունեն ծրագիրը իրականացնելու համար անհրաժեշտ գիտելիք, փորձ, հնարավորություն։

«Մեր ծրագիրը բաց է քննարկումների համար, մենք վստահ ենք, սա այն թիմն է, որն ի վիճակի է իրականացնել իր խոստումը, մենք դատարկ խոսող մարդու տեսակը չենք, ինչ ասում ենք, անելու ենք։ Գիտենք, թե դա ինչպես պետք է անել։ Երևի յուրաքանչյուր իշխանություն ցանկանում է ժողովրդին երջանկացնել, բայց լավ իշխանությունն այն է, որ գիտի, թե դա ինչպես պետք է անել։ Ես ասում եմ՝ մենք գիտենք, թե ինչպես անել»,- խոսքն ամփոփեց նա։