Համոզված եմ՝ Գորիսում «Հայաստան» դաշինքը ձայների մեծամասնություն է ստանալու. Առուշան Առուշանյան

Քաղաքական 18:53 08/06/2021 Հայաստան

«Գուշակություններ չեմ անելու, ես համոզված եմ, որ Գորիսում «Հայաստան» դաշինքը ձայների մեծամասնություն է ստանալու»,- այսօր լրագրողների հետ ճեպազրույցում հայտարարեց Գորիսի համայնքապետ Առուշան Առուշանյանը:

Նա նշեց, որ այսօրվա իշխանություններն այնպիսին ռեսուրսներ են օգտագործում, որ մարդկանց ծիծաղն է առաջանում՝ նրանց վախեցնելով, թե աշխատանքից կազատեն, այս կանեն, այն կանեն և այլն:
Հնչող մեղադրանքները, թե «Հայաստան» դաշինքին սատարող համայնքապետերը ստիպում են բնակիչներին այս կամ այն անձի օգտին քվեարկել, Գորիսի համայնքապետը դրանք անլուրջ համարեց:

Հարցին, թե հնարավոր է, որ կառավարության կողմից Սյունիքի մարզի հիմնադրամին հատկացված 500 միլիոն դրամ սուբսիդիա տրամադրելը դիտարկվի որպես նախընտրական քայլ՝ Առուշ Առուշանյանը նկատեց, որ լրագրողն ինքն իր հարցին արդեն պատասխանեց:

Նա հայտնեց, որ իշխանությունները փորձում են վարչական ռեսուրսներ օգտագործել, բայց չի կարծում, թե այն հաջողություն կբերի:

Անգրադառնալով Գորիսի անվտանգային խնդիրներին՝ համայնքապետը նշեց, որ նույն վիճակն է, որևէ փոփոխություն չկա, թշնամին կրկին համայնքի տարածքում է:

«2017 թվականին Լիսկայի ջախջախիչ պարտությունից հետո, կրկնում եմ՝ ջախջախիչ պարտությունից հետո, մենք նրան Սյունիքում չենք տեսել»,- պատասխանելով լրագրողի հարցին ասաց Առուշանյանը և շեշտեց, որ Սուրիկ Խաչատրյանը հաստատ դաշինքին չի սատարում, և իրենք ցանկություն չունեն նման մարդկանց հետ ճանապարհ գնալ:

Գորիսի համայնքապետը իր խոսքի վերջում կոչ արեց բնակիչներին երբեք և ոչ մի դեպքում չընտրել Նիկոլ Փաշինյանին:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: