Ձեր վստահելի աղբյուրը

ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը Վայքի բնակիչների հետ հանդիպման ընթացքում անդրադարձավ մի շարք խնդիրների՝ այդ թվում երկրում ձևավորված քաղաքական մթնոլորտին։

«Թշնամություն՝ սևեր-սպիտակներ, հայաստանցիներ-ղարաբաղցիներ, հներ-նորեր, հիմա էլ նոր թեզ են առաջ քաշել՝ գուղապետեր և այլոք։ Այդպես ստացվեց՝ երկիրը բաժանվեց նաև գյուղապետերի։  Բանակում արդեն սկսեցին՝ այս գնդի հրամանատարը մերն է, մերը չի, մեր համար աշխատում է, թե՝ ոչ։ Բոլոր զինծառայողները մերն են։ Եթե սկսում ես քաղաքական ենթատեքստով մարտական սպային ազատել աշխատանքից միայն այն պատճառով, որ ինքը հրաժարվում է քո օգտին քարոզչություն վարել, դա հանցագործություն է։ Սկսել են այդպես 2018 թվականից և դա մեր պարտության պատճառներից մեկն է»,- ասաց Քոչարյանը։

Նրա գնահատմամբ՝ այս իշխանություններն անուղղելի են, որոնց պետք է վռնդել պաշտոնից։

«Ինձ հետաքրքրել է,թե ինչպես են այս իշխանությունները դուրս գալու ժողովրդի մեջ, որովհետև այն արդյունքները, որոնք կային, մարդամեջ դուրս գալու արդյունքներ չէին։ Մտածում էի՝ դուրս կգան կասեն ժողովուրդ ջան, մենք ձեզ հիասթափեցրել ենք, ձախողել ենք ամեն ինչ, տվել ենք բազմաթիվ խոստումներ, բայց տեր չենք կանգնել դրանց։

Ավելին՝ հրահրել ենք պատերազմ, զոհեր և այլն։ Պետք է չոքեին և ասեին՝ ժողովուրդ ջան, ղալաթ ենք արել, բայց մի շանս էլ տվեք, միգուցե մենք ինչ-որ բան շտկենք։ Պարզվեց՝ ոչ, մտել են քարոզարշավի մեջ՝ ագրեսիվ, լկտի պահվածքով։ Երևի հաշվարկը մեկն է։ Ժողովուրդը վախկոտ է, ուժ ցույց տան, վարչական ռեսուրս ցույց տան, որ ուժի կողմը թեքվեն։ Ժողովուրդ ջան, հիմա ասեք, մենք վախկո՞տ ենք»,- հարցադրում արեց ՀՀ երկրորդ նախագահը և պատասխանը եղավ բացասական։