Ձեր վստահելի աղբյուրը

«Ամենակարևորը դուք իմացեք, ես ոչ մի սուտ բան ձեզ չեմ ասելու, ասելու եմ իրականությունը, այն խնդիրները, որոնք կան»,- Գավառում նախընտրական քարոզարշավի շրջանակում բնակիչների հետ հանդիպմանն ասաց ԲՀԿ առաջնորդ, ԲՀԿ ընտրական ցուցակը գլխավորող Գագիկ Ծառուկյանը:

Նրա  խոսքով, այսօր վիճակը շատ ծանր է՝ սոցիալական, տնտեսական, քաղաքական, առողջապահական խնդիրներ, աշխատանք չկա:

«Ծառուկյանը կայացած, տեսած, ունևոր, ճանաչված մարդ է, Ծառուկյանի հիմնական նպատակն ու ծրագիրն է, որ կարողանա ամեն մարդ իր հնարավորությունն օգտագործի ի օգուտ իր երկրի, իր ժողովրդի: Իմ ցանկությունը սա է»,- ասաց նա:

Նա նշեց, որ ժողովուրդը վարկի տակ է, վերցրել է ապրելու, ուսման վարձ վճարելու, բուժման համար ու այսօր չեն կարողանում փակել:

Որպես խնդիր ԲՀԿ նախագահը նշեց անվտանգության հարցը. «Պետք է ապահովել ժողովորդի անվտանգությունը: Միայն մեկ ճանապարհ կա՝  Ռուսաստանն է, որը մեր դարավոր գործընկերն  է, հարազատն ու բարեկամը, միշտ ցույց է տվել, որ մեզ հետ է ցանկացած հարցով: Այսօր պետք է այդ բարեկամական հարաբերությունը ոչ միայն խոսքով, այլ իրականացնենք, ամրապնդենք: Մեր սահմանի վրա կանգնած լինի հայ և ռուս զինվորը, որ մարդիկ ապահով լինեն»:

Նա նշեց, որ գյուղատնտեսությամբ զբաղվողներին պետք է տալ սերմ, պարարտանյութ, ապրանքն ընդունել, փաթեթավորել, արտահանել, որպեսզի գյուղացին իմանա՝ իր մշակածը գետնին չի մնա: Նրա խոսքով, գյուղատնտեսական վարկը պետք է զրոյական լինի: 

Գագիկ Ծառուկյանն ասաց, որ իրենց ծրագրում 30 կետ է, որոնք անհրաժեշտ է իրականացնել երկիրն այս վիճակից դուրս բերելու համար, որպեսզի մարդիկ չհեռանան երկրից: Նա ընդգծեց, որ գիտի ցանկացած խնդիր, գիտի դրանց լուծումները: