Ձեր վստահելի աղբյուրը

Հայաստանն ու Ադրբեջանը պետք է կրկին միասին ապրեն, կողք կողքի՝ անվտանգության ու տնտեսական բարգավաճման մեջ: Այս մասին «Պրիմակովյան ընթերցումներ» ֆորումում իր ելույթի ժամանակ հայտարարել է Ռուսաստանի արտգործնախարար Սերգեյ Լավրովը:

«Ռուսաստանը կշարունակի ակտիվորեն նպաստել միջազգային հակամարտությունների լուծմանը: Մենք աշխատում ենք Սիրիայում, օգնում ենք վերականգնել խաղաղ կյանքը Լեռնային Ղարաբաղում այն բանից հետո, երբ դադարեցրեցինք արյունալի պատերազմը», - ասել է Լավրովը:

Այնուհետև ՌՀՀ ռեկտոր Արմեն Դարբինյանը Լավրովին հարց է ուղղել  տարածաշրջանային ապաշրջափակման ու դրանում Թուրքիային ներգրավելու վերաբերյալ, ասելով, այն ղարաբաղյան պատերազմի լիարժեք մասնակից էր, և, ըստ էության, հակամարտության կողմ, որy փճ տարի փակ է պահել հայ-թուրքկան սահմանը ու պետք է իր կրի պատասխանատվության իր մասը, որին ի պատասխան Լավրովն ասել է, որ ապաշրջափակման եռակողմ ձևաչափին չի մասնակցում նաև Իրանը։

«Ես ուզում եմ ավելացնել, որ Իրանը ևս չի մասնակցում եռակողմ խմբի աշխատանքներին, որը ոչ պակաս, և գուցե ավելի շատ է շահագրգռված, որ հաշվի առնվի իր շահերը», - ասում է Լավրովը, ավելացնելով, որ եռակողմ խումբը պատժի մասին չէ, այլ նորմալ, տնտեսական կյանքի վերականգնման, որը գոյություն ուներ մինչև 80-ականների վերջ:

«Հիմա, եթե խոսենք այն մասին, թե ովքեր են պատերազմել և ովքեր են կռվել, այս հարցը փակ է բոլոր ողջամիտ մարդկանց համար: Արյունահեղությունն ավարտվեց: Այն ավարտվեց մի փոքր ուշ, քան մենք առաջարկեցինք կողմերին: Եվ մենք մեղավոր չենք, որ պատերազմն ավելի երկար տևեց, զինադադարը ձեռք բերվեց ավելի ուշ: Մենք միայն միջնորդներ էինք: Մենք չէինք կարող կողմերին ստիպել ինչ-որ բաներ անել: Մենք միայն փորձեցինք համոզել, որ հետագա արյունահեղությունն անիմաստ է և ծայրաստիճան վտանգավոր», - ասել է Ռուսաստանի արտգործնախարարը, հավելով, որ հիմա իրենց խաղաղապահները կատարում են իրենց մանդատը, ընդհանրապես խոշոր միջադեպեր չկան:

«Այո, լարվածություն կա ադրբեջանա-հայկական սահմանի որոշակի հատվածներում: Բայց սա ոչ մի կապ չունի Լեռնային Ղարաբաղի հետ: Եվ 2020-ի նոյեմբերի 9-ին ռազմական գործողությունների դադարեցմանը զուգահեռ, նախագահները պայմանավորվեցին ապաշրջափակել բոլոր հաղորդակցությունները: Սա, ըստ էության, հիմնական սկզբունքներից մեկն է, որը տարիներ առաջ համաձայնեցրել էին ԵԱՀԿ Մինսկի խմբի համանախագահները», - ասել է Լավրովը:

Միևնույն ժամանակ, նրա խոսքերով, Հայաստանի և Ադրբեջանի միջև կոմունիկացիաների բացման մեջ շահագրգռված են ոչ միայն այս երկու երկրները, այլ նաև Ռուսաստանը, Թուրքիան և Իրանը, որոնց կարծիքը նույնպես պետք է հաշվի առնել բանակցային գործընթացում:

«Ես հասկանում եմ, որ հիմա շատերն ասում են, որ Լեռնային Ղարաբաղի կարգավիճակը մնում է չլուծված: Սա վերջնականապես համաձայնեցվելու է ԵԱՀԿ Մինսկի խմբի համանախագահների մասնակցությամբ, որոնք այս փուլում, հավանաբար, չպետք է բարձրացնեն կարգավիճակի խնդիրը, այլ նպաստեն վստահության ամրապնդման միջոցառումների ամրապնդմանը, հումանիտար հարցերի լուծմանը, այնպես, որ հայերն ու ադրբեջանցիները նորից սկսեն ապրել կողք կողքի, միասին՝ անվտանգության և տնտեսական բարեկեցության պայմաններում: Եվ ապա, հավաստիացնում եմ ձեզ, մի երկու-երեք տարի հետո, եթե մենք նման կյանք հաստատենք, կարգավիճակի բոլոր խնդիրները շատ ավելի հեշտ կլուծվեն», - ասում է ՌԴ ԱԳՆ ղեկավարը:

«Ես հիմա չէի կենտրոնանա այն հայտարարությունների վրա, որոնք այժմ հնչում են տարածաշրջանի մայրաքաղաքներից, հակամարտության մասնակից երկրներից։ Այնտեղ գերակշռում են հույզերը, և մենք կոչ ենք անում բոլորին, ովքեր ներգրավված են այս իրավիճակում, օգնել հանգստացնել և հաստատել բնականոն կյանք նրանց համար, ովքեր տեղում են», - ասել է Լավրովը: