Ձեր վստահելի աղբյուրը

«Մեր հետ համագործակցող քաղաքացիների օգնությամբ հայտնաբերել ենք, որ այս պահի դրությամբ նույն անուն- ազգանունով և հայրանունով, նույն ծննդյան թվերով 38 անձ երկու տարբեր տեղեր է գրանցված»,- հրավիրված մամուլի ասուլիսում հայտնեց «Ընտրությունների վերահսկման կոմիտե»-ի անդամ «Իրավական ուղի» ՀԿ համահիմնադիր Ռուբեն Մելիքյանը և հավելեց, որ տեսականորեն հնարավոր է, որ դրանք տարբեր մարդիկ լինեն, բայց գործնականում այն շատ փոքր է:

Նա հայտնեց, որ շարունակելու են այդ անունները վեր հանել և ընտրություններից հետո երկու տեղում էլ քվեարկած լինելու և ստարգրությունների առկայության դեպքում կդիմեն ոստիկանությանը և նման քաղաքացիներին հորդորեց չքվեարկել երկու տեղում:

Մելիքյանը նաև հայտնեց, որ ոստիկանության անձնագրային վարչություններում քաղաքացիները հարյուրներով սպասում են իրենց հերթին, որպեսզի գրանցվեն քվեարկելու համար և որպես օրինակ բերեց Նոր Նորքի ստորաբաժանման վիճակը, երբ 12 պատուհանից 4-ն է աշխատել և դանդաղ է սպասարկումն տեղի ունենեցել:

Նա ոստիկանությանը կոչ արեց այդ խնդրին ուշադրություն դարձնել, հակառակ դեպքում քաղաքացիներին կզրկեն ընտրության իրավունքից, որը լրջագույն խախտում է:

«Մենք գրանցման մեկ մերժման ահազանգ ենք ստացել Արցախի բնակչից: Ժամանակին վարչապետի պաշտոնակատարը լայքեր էր հավաքում «Արցախը Հայաստանն է և վերջ» բղավելով, հիմա միայն լայքեր հավաքելով չէ, հիմա նրանք տուն ու տեղ են կորցրել, այստեղ են ապրում և մերժում են նրանց քվեարկելու իրավունքը»,- հայտնեց «Ընտրությունների վերահսկման կոմիտե»-ի անդամը:

Նա հայտարարեց, որ բոլոր նրանք, ում օկուպացված տարածքներում գրանցված լինելու հիմքով կմերժեն գրանցել քվեարկողների ցուցակում՝ կարող են դիմել «Իրավական ուղի» ,- ՀԿ-ին և իրենք կօժանդակեն վարչական դատարան դիմելու հարցում:

Մելիքյանը տեղեկացրեց, որ պաստառների, քարոզչական նյութերի հետ կապված երեք խնդիր են վեր հանել:

Նրա խոսքով ՔՊ-ն Արմավիրի մարզում անթուլատրելի շինության վրա քարոզչական պաստառ էր փակցրել, բայց իրենց ահազանգից հետո այն վերացվել է:

Անդրադառնալով անուղղակի ընտրակաշառքի երևույթին՝ բանախոսը տեղեկացրեց, որ տարվա կեսին անհասկանալիորեն 300-ից ավել մարդու աշխատավարձեր են բարձրացվել և այն կապվել է ՔՊ-ի թեկնածուի հետ:

Տեղեկացնելով, որ մյուս դեպքը վերաբերում էր խաղողի մթերման խնդրին, որը կապվում է «Բարգավաճ Հայաստան» կուսակցության հետ՝ Մելիքյանը հայտնեց, որ  ԿԸՀ-ից կապնվել են իրենց և ասել, որ նման բովանդակությամբ բոլոր պաստառները վերացվել են:

Նա նաև հայտնեց, որ մեկ դիմում է եղել թեկնածուի մասով, ըստ որի՝ ՔՊ-ի թեկնածուն չի համապատասխանում ՀՀ քաղաքացիություն ունենալու ցենզին, քանի որ վերջին 4 տարիների ընթացքում համարվել է Իրանի քաղաքացի և տեղեկացրեց, որ վերջինս կապ է հաստատել իրենց հետ և ասել, որ պարզաբանումներ կներկայացնի:

Անդրադառնալով քարոզարշավի ընթացքում աննախադեպ ծավալներով ատելության խոսքի կիրառման  դեպքերին ԱԺ պատգամավոր Նաիրա Զոհրաբյանը հայտնեց. «Վարչապետի ժ/պ-ն, մեր համոզմամբ, օգտագործում է ուղղակիորեն անթույլատրելի բառապաշաև և բացահայտ ատելության բառամթերք, էլ չեմ խոսում հայհոյանքի և ոչ ցիվիլ բառապաշարի մասին՝ ըստ էության էսկալացիայի տանելով քարոզարշավը, հասարակության մի հատվածին ուղղորդելով հասարակության մեկ այլ հատվածի դեն»:

Ընդգծելով, որ դրանք բոլորը Քրեական օրենսգրքի 222 հոդվածի երկրորդ կետով դատապարտելի հանցակազմ են պարունակում՝ պատգամավորը ընթերցեց Նիկոլ Փաշինյանի հայտնի հայտարարությունները և բռնության կոչերը: