Ձեր վստահելի աղբյուրը

«Այս իշխանությանը գերիների խնդիրն ընդհանրապես չի մտահոգում, երբեք չի մտահոգել»,- ասուլիսում ասաց «Պատիվ ունեմ» դաշինքի նախընտրական շտաբի ներկայացուցիչ, ՀՀԿ ԳՄ անդամ Դավիթ Հարությունյանը:

Նա ուշադրություն հրավիրեց այն հանգամանքի վրա, որ նոյեմբերյան հայտարարության մեջ բոլոր հարցերին անդրադարձ է կատարված շատ հստակ ժամանակացույցով, բայց գերիների հարցին՝ շատ ընդհանուր տերմինաբանությամբ:

«Երբ խոսքը վերաբերում էր հողերը վերադարձնելուն, ապա այս իշխանությունը շատ հստակ վերցնում է պարտավորություններ և ամրագրում է ժամկետներ, երբ խոսքը վերաբերում է  գերիներ վերադարձնելուն, որևէ ժամկետ դուք չեք գտնի»,- ասաց Դ. Հարությունյանը:

Նա նշեց, որ նույն ձեռագիրը տեսնում են հետագա ողջ գործունեության ընթացքում, հունվարյան հայտարարության մեջ որևէ խոսք չկա գերիների մասին, սահմանների դելիմիտացիայի և դեմարկացիայի նախագածի մեջ որևէ խոսք չկա գերիների մասին:

«Այսինքն, այս իշխանությունը գերիների հարցը մատնել է անտարբերության: Իհարկե, իրենց բնորոշ ոճով, ինչպես իրենք էին նշում, որ սահմանները պաշտպանված են, մեծ աշխատանքներ են կատարվում, ուղղակի ոչ ոք չի տեսնում՝ ոչ ադրբեջանցիները, ոչ մեր հասարակությունն ու զինվորականները, կարծում եմ, իրենք հավանաբար հիմա կասեն, որ գերիների հետ կապված մեծ աշխատանք են տանում, ուղղակի ոչ ոք չի տեսնում՝ ոչ հայ հասարակությունը, ոչ ադրբեջանցի, ոչ ռուս, այդպիսի գաղտնի աշխատանք է տարվում, ամենայն հավանականությամբ, մտովի:

Իսկ իրականությունը շատ պարզ է՝ գերիներին մատնել են անտերության»,- ասաց Դ. Հարությունյանը: