Ձեր վստահելի աղբյուրը

«Հայաստան» դաշինքի առաջնորդ, ՀՀ երկրորդ նախագահ Ռոբերտ Քոչարյանի գլխավորությամբ, ինչպես նաև դաշինքի ներկայացուցիչների մասնակցությամբ  այսօր տեղի է ունեցել հանդիպում ԵԱՀԿ/ԺՀՄԻԳ դիտորդական առաքելության ներկայացուցիչների հետ: Այս մասին հայտնում են «Հայաստան» դաշինքի կենտրոնական շտաբի մամուլի ծառայությունից: 

Հանդիպման շրջանակում ԵԱՀԿ դիտորդական առաքելության կողմից, ի թիվս այլ հարցերի, ներկայացվել է նաև միջանկյալ հաշվետվություն Հայաստանում արտահերթ խորհրդարանական ընտրությունների վերաբերյալ:

«Մեր գնահատմամբ,  վերոնշյալ փաստաթուղթը  կրում է խիստ ընդհանրական բնույթ, քանի որ հաշվետվության մեջ Հայաստանում տիրող իրական իրավիճակը որևէ արտացոլում չի գտել:

Հայաստանի գործող իշխանությունների կողմից ընտրական գործընթացների շրջանակում թույլ տված խախտումները բազմակի են (ատելության խոսք, վարչական ռեսուրսի չարաշահում  և այլն), կրում են շարունակական բնույթ և անընդունելի են: Սակայն, ԵԱՀԿ դիտորդական առաքելությունը, ունենալով հստակ տեղեկատվություն՝  ի թիվս այլ աղբյուրների, այդ թվում նաև  «Հայաստան» դաշինքի կողմից ներկայացված,  որևէ կերպ չի անդրադարձել դրան։

Նման լռությունը համարժեք է առաքելության փաստացի կատարումից խուսափելուն  և հիմնավոր կասկածների հիմք է վերջիններիս անաչառության մասով»,- նշված է «Հայաստան» դաշինքի կենտրոնական շտաբի պաշտոնական ներկայացուցիչ Արամ Վարդևանյանի հայտարարության մեջ: