Ձեր վստահելի աղբյուրը

«Յուրաքանչյուր երկրում անվտանգության համար պայքարում հիմնական երկու ուժ կա՝ Զինված ուժեր և դիվանագիտական կորպուս: Երեք տարի շարունակ ամեն ինչ արվեց, որպեսզի ջախջախեն, կազմալուծեն մեր Զինված ուժերը, արվում է ամեն ինչ, որպեսզի ջախջախվի դիվանագիտական կորպոստը»,- ասուլիսում ասաց «Պատիվ ունեմ» դաշինքի նախընտրական շտաբի ներկայացուցիչ, ՀՀԿ ԳՄ անդամ Դավիթ Հարությունյանը:

Նա ընդգծեց, որ այսօր զինվոր չունենք նաև այս մարտադաշտում՝ դիվանագիտական ասպարեզում.

«Ինչպես զինվոր չունենք սահմանի վրա, որ կարողանա անառիկ պահել Հայաստանի տարածքը, այսօր զինվոր չունենք դիվանագիտական մարտադաշտում, որպեսզի նրանք ևս պաշտպանեն մեր երկիրը դիվանագիտական ասպարեզում»:

Դավիթ Հարությունյանը հակադարձեց Փաշինյանի հայտարարություններից մեկին՝ նշելով, որ մեր զիվորները չեն եղել սոված:

«Ուղղակի այդ մարդն  ինքը երբևէ չծառայելով, հավանաբար, չի պատկերացնում, թե  ինչ է Զինված ուժերը: Իհարկե, Զինված ուժերում ռեստորանային պայմաններ չեն, բայց այն, ինչ ինքն ասում է, զառանցանք անվանելուց բացի այլ ձևով չեմ կարողանում գնահատել»,- ասաց «Պատիվ ունեմ» դաշինքի նախընտրական շտաբի ներկայացուցիչը:

Նա նաև նշեց, որ թեև Փաշինյանը հայտարարում է՝ իրեն հաջողվել է ավելի շատ զենքով, ռազմամթերքով ապահովել, վերազինել բանակը, սակայն իրականում նա արել է լրիվ հակառակը:

«Նա անիմաստ ձևով մսխել է պաշտպանության բյուջեի միջոցները՝ դրանով իսկ քայքայելով մեր Զինված ուժերը: Նաև բազմաթիվ այլ քայլեր է արել քայքայելու համար Զինված ուժերը:

Զինված ուժերը Հայաստանի այն կայացած կառույցն էր, որն իր համար ներկայացնում էր վտանգ: Հիմա ի՞նչ է փորձել անել: Փորձել է չեզոքացնել իր համար վտանգը»,- ասաց Դ. Հարությունյանը: