Ձեր վստահելի աղբյուրը

«Պատիվ ունեմ» դաշինքի քարոզարշավի շրջանակում դաշինքի թեկնածուները Տարոն Մարգարյանի գլխավորությամբ հունիսի 8-ից սկսել են մայրաքաղաք Երևանում ընտրողների հետ բակային հանդիպումները։  Թեկնածուները հանդիպել և քննարկումներ են անցկացրել Էրեբունի  և Նուբարաշեն վարչական շրջանների աջակիցների ու համախոհների հետ: Նրանք ներկայացրել են դաշինքի նախընտրական ծրագիրն ու մոտեցումները, պատասխանել հարցերին:

Հանդիպումներին իր մասնակցությունն է ունեցել նաև ՀՀԿ նախագահ, ՀՀ երրորդ նախագահ Սերժ Սարգսյանը:

«Ունենք երիտասարդ, փորձառու թիմ, ունենք  կատարած աշխատանք»,- քաղաքացիների հետ զրույցում ասում է Տարոն Մարգարյանը:

Մի կին արձագանքում է. «Ձեզ լավ գիտեմ, մի անգամ ընտրել եմ ձեզ, ուրախ եմ, նորից կընտրեմ»:

Քաղաքացիներից մեկն ասում է. «Պոպուլիզմից վերանանք, երկրի, հողի վրա կանգնենք, երկիր սարքնեն այն մարդի, ովքեր սարքել էին: Երեք  տարի միայն քանդում է, լսում ենք միայն սուտ խոստումներ: Ապաշնորհ կառավարման միջոցով ու տխմար դիվանագիտության  ճանապարահով սարքեցին պատերազմն ու այսքան զոհ տվեցին, և ուզում են գցել նախկինների վրա, ասում են  20 տարի առաջ են տվել»:

Մեկ այլ քաղաքացի էլ նշում է՝  պետք է սրանց վռդնել, որ երկրում ամեն ինչ կարգավորվի. «Պետք է նախկինի պես զորք ունենանք: Թուրքը ռիսկ չէր անում գար, հասներ սահմանին, իսկ հիմա եկել, հասել է Սևանա լճի մոտ»:

«Դրա համար պետք է կպնենք գործին, որ մի բան ստացվի»,- քաղաքացիներին արձագանքում է «Պատիվ ունեմ» դաշինքի անդամ Տարոն Մարգարյանը: