Ձեր վստահելի աղբյուրը

«Այո, Ռուսաստանը մեր դաշնակիցն էր, այսօր էլ է մեր դաշնակիցը, վստահ եմ, վաղն էլ է լինելու մեր դաշնակիցը և որպես դաշնակից, հիմնականում իրենք կատարել են իրենց պարտականությունները»,- հունիսի 8-ին Աշտարակում բնակիչների հետ հանդիպմանն ասել է ՀՀԿ նախագահ, ՀՀ երրորդ նախագահ Սերժ Սարգսյանը, ով «Պատիվ ունեմ» դաշինքի թիմակիցների հետ այցելել է Արագածոտնի մարզ:

Նա նշել է, պետք է հասկանալ շատ պարզ մի բան, որ այդ դաշնակցային հարաբերությունները միակողմանի չեն.

«Մենք չենք կարող այստեղ նստենք, ենթադրենք, որ մենք միայն պետք է Ռուսաստանից ուզենք և իրենք իրենց զինվորներին պետք է բերեն այստեղ զոհեն, իրենք գազը մեզ ձրի պետք է տան: Կարծես թե իրանք մեզ պարտական են: Չի կարող այդպիսի հարաբերություն լինի, մարդկային հարաբերություններում չկա այդպիսի բան»:

Սերժ Սարգսյանն ասել է՝ ընկերները նաև նրա համար են, որ իրար օգնեն, և ոչ թե միշտ մեկը մյուսին օգնի, եթե մեկը միշտ մյուսին օգնում է, արդեն դա ընկերություն չէ:

«Իսկ մենք ի՞նչ ենք տեսնում: Եթե դու անհարգալից վերաբերմունք ես ցուցաբերում Ռուսաստանի նախագահի նկատմամբ, նա քո նկատմամբ հարգալից է վերաբերվելո՞ւ:

Արա, դու ո՞վ դառար, որ օդանավակայանում չես դիմավորում Ռուսաստանի նախագահին, ո՞վ դառար, դու ո՞վ ես: Անկախ անձից` Պուտինն է, Մեդվեդևն է, Ելցինն է, դու ով ես, ինչի ես այդ մարդուն անհարգալից վերաբերմունք ցուցաբերում:

Մեր օրենքներով, կոնկրետ արարողակարգի մասին օրենքով, Հայաստան ժամանած ՄԱԿ-ի անվտանգության խորհրդի մշտական անդամ երկրների նախագահներին և վարչապետներին օդանավակայանում դիմավորում է ՀՀ նախագահը կամ վարչապետը: Կարո՞ղ է մեր այդ օրենքները միայն մենք գիտենք, ռուսներն էլ չէ՞ դրա մասին գիտեն:

Երբ դու դա չես անում, ու հետո քո թիմով տարածում ես՝ բա գնացեք բոլորին ասեք՝ տեսնում եք, թե ես ի՞նչ տղա եմ, Պուտինին ոնց վերաբերվեցի, դա տղայություն չի, դա շանտղայություն է, որովհետև ախր չի կարող այդ բանը հենց այնպես անցնել»,- ասել է ՀՀ երրորդ նախագահը: