Ձեր վստահելի աղբյուրը

«Ասում է՝ մեր զինվորին մենք սոված ենք պահել, մեր զինվորին անասնակեր ենք տվել, կոնֆետն իբր գցում էինք՝ մեր զինվորը հողը ճանկռելով վերցնում էր։ Երբ որ ասում եմ անասուն, կողքից ասում են՝ ինչու ես ասում անասուն։ Այ անասուն, այդ ո՞ր զինվորի մասին ես խոսում»,- Սյունիքի մարզում  «Պատիվ ունեմ» դաշինքի ակտիվի և տեղի բնակչության հետ հանդիպման ժամանակ ասել է ՀՀ երրորդ նախագահ, ՀՀԿ նախագահ Սերժ Սարգսյանը։

Շարունանելով իր խոսքը՝ նա հարցադրումներ է արել. «Այն զինվորի՞, որ 30 տարի ադրբեջանցիներին ծնկի բերած պահեց, այն զինվորի՞, որ Ադրբեջանի 20 տոկոսը, ինչպես ադրբեջանցիներն են ասում, վերահսկողության տակ պահեց, այն զինվորի՞, որ սահման էր պահում, ո՞ր զինվորի մասին ես խոսում։ Չե՞ս սատկում, լավ, ո՞նց կարելի է չափն այդքան անցնել»։

ՀՀ երրորդ նախագահը ներողություն է խնդրում իր տոնի համար՝ նշելով, երբ որ խոսքը գնում է  բանակի մասին, դժվարանում է հանգիստ խոսել. «Որովհետև այն բանակն էր, որն այս  տարածաշրջանում համարվում էր մարտունակներից մեկը, մասնակցելով տարբեր միջազգային զինվորական մրցումների, 2-րդ տեղ էր գրավում, 3-րդ տեղ էր գրավում, այն բանակը, որ բյուջեից քիչ ծախսելով, դաշնակիցներից այնքան սպառազինություն էր ստանում, որ մենք բոլորս ապահով ասում էինք՝ մեր բանակը պաշտպանում է մեր սահմանները։

Եթե ինքը զինվորի տեղը գիտի, ինքը զինվորին այդպես կվերաբերվի՞։

Եթե ինքը զինվորին հարգում է, իր պահած զինվորն այդ է, զինվորին հրաման կտա՞, որ չկրակի, թույլ կտա՞, որ ադրբեջանցին գա ու գերի վերցնի այդ զինվորին, ծաղրի նրան»։

Սերժ Սարգսյանը լուսանկար է ցուցադրել, թե այսօր ինչ վիճակում են մեր զինվորները. «Ախր, սա զինվորի ապրելո՞ւ տեղ է, քնելո՞ւ տեղ է։ Քանի՞ ամիս է անցել։ Ո՞ւթ։ Բա այդ ութ ամսում, որ դու գոնե մի ինչ-որ պայման չես ստեղծել, որ զինվորն այդտեղ գոնե գիշերը քնի, որ կարողանա իր ծառայությունն անցկացնել ու բերանդ բացում ես, խոսում ես նախկին զինվորների մասին կամ մեր մասին, որ զինվորին սոված ենք պահե՞լ։

Ախր, մարդ խոսում է մի բանի մասին, որից ընդհանրապես չի հասկանում։ Այս մարդը դասալիք է եղել, բանակում չի ծառայել։ Քանի որ ինքը մանիպուլյատոր է, 2016 թվականի մայիսին գնացել է դիրք փորելու, դիրք պահելու, ասում է՝  Ապրիլյան պատերազմի մասնակից եմ։ Ինքը մասնակի՞ց է, մնացածն էլ անասնակեր ուտո՞ղ։ Այդպիսի վերաբերմունքի պարագայում մենք ի՞նչ սպասենք։ Մենք գործ ունենք թյուրիմացության հետ»։