Ձեր վստահելի աղբյուրը

Հունիսի 20-ին արտահերթ խորհրդարանական ընտրություններից հետո ՀՀ առաջին նախագահ Լևոն Տեր-Պետրոսյանը չի բացառում ՀՀ երկորրդ նախագահ Ռոբերտ Քոչարյանի  հետ համագործակցությունը։

«Նրանց ուղղված համագործակցության իմ առաջարկը մերժվել է, և այլևս դրան վերադառնալ հնարավոր չէ։ Ուրիշ բան, եթե խորհրդարանում այնպիսի իրավիճակ ստեղծվի, երբ մենք էլ անցնենք, Նիկոլն էլ, Ռոբերտն էլ, ուրիշներ էլ, և որևէ մեկը մեծամասնություն չունենա, ստիպված պետք է գնանք կոալիցիաներ ձևավորելու։ Մենք կնայենք, կտեսնենք։ Ես միշտ կողմ եմ համերաշխությանը, կոալիցիաների, թեև դրանք հիմա Հայաստանում նոր պրոբլեմներ ստեղծող երևույթ են, որը կարող է վեց ամիսը մեկ փոխվել։ Եվ կընկնենք այն երկրների շարքը, որոնք տարին մի քանի անգամ կառավարություն են փոխում։ Վատ տարբերակ է, բայց եթե ուրիշ ելք չկա, իհարկե, պետք է փորձենք»,-ասաց ՀՀ առաջին նախագահը։

Հարցին, եթե ընտրությունների արդյունքում խորհրդարանում հայտնվեն Փաշինյանի, Քոչարյանի, Տեր-Պետրոսյանի ղեկավարած ուժերը, վարչապետի ընտրության ժամանակ ո՞ւմ օգտին կքվեարկի Տեր-Պետրոսյանը, ՀՀ առաջին նախագահը պատասխանեց. «Գիր, ղուշ կգցենք, կորոշենք։ Հիմիկվա խոսելու բան չէ՚։ Կստեղծվի նոր իրավիճակ, և այդտեղ մենք կարծում եմ, լուրջ կվերաբերվենք այդ իրավիճակին, կփորձենք սխալ որոշում չկայացնել»։