Ձեր վստահելի աղբյուրը

«Հանդիպել եմ Լևոն Տեր-Պետրոսյանի հետ, և նա ասել է՝ «հողերը պիտի տաս»»,- Նիկոլ Փաշինյանի՝ 2018-ին արած այս հայտարարության վերաբերյալ լրագրողները մեկնաբանություն խնդրեցին ՀՀ առաջին նախագահ, ՀԱԿ ընտրական ցուցակն առաջնորդող Լևոն Տեր-Պետրոսյանից։

ՀՀ առաջին նախագահն ի պատասխան ասաց, պետք էր հարցն ուղղել ոչ թե իրեն, այլ Նիկոլ Փաշինյանից ասածն ապացուցող ձայնագրություն պահանջել։

«Իր տանն եմ ես եղել, հաստատ ձայնագրել է, թող ցույց տա»,- ասաց Տեր-Պետրոսյանը։

Նա նշեց՝ իրեն միշտ մտահոգել է Արցախի հարցը, Փաշինյանին էլ խորհուրդ է տվել՝ նրա առաջին գործը պետք է լինի Արցախի հարցում այն ժառանգության ֆիքսումը, որը ստացել է Սերժ Սարգսյանից։

«Ասացի՝ ֆիքսել փաստաթղթով։ Հարց է տալիս, ի՞նչ ձևով։ Ասացի, հենց հիմա ես քեզ թելադրում եմ, հարց ես տալիս ԱԳ նախարարին, պահանջում եմ երկու օրվա ընթացքում ինձ ներկայացնել ԼՂ հարցի կարգավորման իրավիճակը ապրիլի 18-ի դրությամբ։ Ասացի՝ ինչո՞ւ է պետք քեզ, որ դրանից ավելի լավ լուծում կբերե՞ս, կլինի քո պատիվը, ավելի վատ լուծում կբերե՞ս, դա կլինի քո խայտառակությունը»,-պատմեց ՀՀ առաջին նախագահը։

Նրա խոսքով, նա նման բան արել է 2008-ին, երբ որոշել էր իր թեկնածությունն առաջադրել, ցանկացել է ֆիքսել այն իրավիճակը, որը ներկայացրել էին ԵԱՀԿ Մինսկի խմբի համանախագահները։ Խոսել է ԱՄՆ դեսպանատան հավատարմատարի հետ, խնդրել ամերիկացի համանախագահին փոխանցել, որ փաստաթղթեի 99 տոկոսով համաձայնեցված հատվածը հրապարակվի որպես պաշտոնական փաստաթուղթ։

«Ես ասացի, դա և ինձ է պետք, և Սերժին, եթե նա ընտրվի նախագահ։ Մենք կիմանանք, թե որ կետից ենք սկսելու ղարաբաղյան կարգավորման գործընթացը։ Այդ նամակը կա, հրապարակված է Վիկիլիքսում։ Մեկ ամիս անց Բրայզան պաշտոնապես ներկայացրեց այդ փաստաթուղթը։ Նույն բանը ես Նիկոլին էի ասում, պետք է ֆիքսես, թե ինչ-ինչ ժառանգություն ես ստացել։ Ուրիշ խոսակցություն չի եղել։ Բայց այդ ձայնագրությունը կպահանջեք Նիկոլից»,- ասաց ՀՀ առաջին նախագահը։