Ձեր վստահելի աղբյուրը

«Ճակատագրական պահ է երկրի համար, մենք եկել ենք ձեր մոտ ասելու, որ մենք որպես քաղաքական թիմ, ընտրություններին մասնակցող դաշինք, պատրաստ ենք պատասխանատվություն ստանձնելու երկրի ապագայի համար»,- Ալագյազ եզդիաբնակ համայնքում հայտարարեց «Հայաստան» դաշինքի առաջնորդ, երկրորդ նախագահ Ռոբերտ Քոչարյանը և հավելեց, որ գործով արդեն ապացուցել են՝ ի վիճակի են առկա հարցերին լուծում տալ, երկիրն առաջ տանել, արժանապատիվ խաղաղություն հաստատել:

Երկրորդ նախագահը շեշտեց, որ երբ խոստանում է տնտեսական զարգացման մասին, նկատի չունի դանդաղ զարգացումը, այլ ավելի շուտ խոսում է շատ արագ՝ երկնիշ տնտեսական աճի մասին, որը ապահովել է իր պաշտոնավարման 10 տարվա ընթացքում: 

Ընդգծելով, որ իր նախագահության ընթացքում արձանագրվել է տնտեսության 10-14 % աճ, իսկ այսօր առկա է 7.5 % անկում՝ Ռոբերտ Քոչարյանն ասաց. «Թվում է, թե այդ տոկոսները բան չեն ասում, բայց դրանք ամեն օր ձեր կյանքում զգացնել են տալիս, զգացնել են տալիս ձեր սառնարանի պարունակության վրա, ձեր գրպանի վրա, երբ ամեն անգամ շուկա գնալուց հետո ստուգում եք, թե ձեր գրպանում ի՞նչ է մնում, կամ չի մնում, կամ նույն գումարով ինչքա՞ն ապրանք եք կարողանում գնել: Մենք գալիս ենք այդ հարցերին ռադիկալ լուծում տալու համար»:

Ըստ «Հայաստան» դաշինքի առաջնորդի՝ այն ծավալի ճանապարհաշինությունը, որը եղել է իր պաշտոնավարման տարիներին, երբեք չի եղել:

«Հիմա իշխանությունները սիրում են ասել, որ ասֆալտ են անում, բայց դեռ շատ հեռու են այն ծավալներից, որը մենք էինք անում»,- հայտնեց Քոչարյանը և հավելեց, որ իր պաշտոնավարման տարիներին շինարարության 22-29% աճ էր ապահովվում, ինչը նշանակում էր, որ երկրում աշխուժություն է եղել:

Ընդգծելով, որ տնտեսությունը վերականգնելու համար ռեսուրսները կան և՛ Հայաստանում, և՛ նրա սահմաններից դուրս՝ Ռոբերտ Քոչարյանը շեշտեց, որ այն ուժն են, որ ի վիճակի է ապահովել ներդրումային ծրագիր, քանի որ իրենք վստահություն են վայելում խոշոր ներդրողների կողմից և ունեն վարչական հմտություն ծրագրերն իրականացնելու համար:

ՀՀ երկրորդ նախագահի խոսքով՝ Հայաստանում կա 3 խոշոր ճգնաժամ՝ անվտանգության, տնտեսության և կառավարելիության:

«Կառավարման ճգնաժամն, իմ կարծիքով, ամենից արագ լուծվողներից մեկն է, բայց նաև այս իշխանությունների համար չլուծվող հարց է, քանի որ չգիտեն, թե ինչ է կառավարումը: Ուղղակի գլուխ չեն հանում, կարծես մի բարդ մեքենա են տվել, այս ու այն կողմից բզում են մեքենան տեղից չի շարժվում, ու չեն էլ կարող սովորել, այդ շնորհքը չունեն»,- հայտարարեց դաշինքի առաջնորդը:

Ռոբերտ Քոչարյանը նկատեց, որ Հայաստանում շատերի համար պարզ չէ եզդիների ավանդույթները, այդ պատճառով էլ հայ ժողովուրդը իր կողքին ապրող փոքրամասնությունների մասին ավելի շատ պետք է իմանա:

«Դուք հայկական մշակույթը լավ եք ճանաչում, բայց հայերս ձերը լավ չենք ճանաչում, իսկ քանի որ երկիրը մեկն է, մենք պետք է մեզ ավելի շատ հնարավորություն տանք, որ ճանաչենք ձեր ազգային յուրահատկությունները»,- ընդգծեց Քոչարյանը և խոստացավ, որ այդպիսի առաջարկություններով հանդես կգա և այդ առումով ճշգրտումներ կլինի նաև դպրոցների ուսումնական ծրագրերում:

Նա նկատեց, որ երբ պատերազմ է, եզդի երիտասարդները զորակոչվում և պայքարում են ընդհանուր երկրի համար և անհրաժեշտություն կա, որ հայ ժողովուրդը մի փոքր ուրիշ աչքերով նայի իր կողքին ապրող փոքրամասնություններին:

«Մենք ասում ենք, որ եղածների մեջ մենք ամենամեծ հնարավորությունները, փորձ, գիտելիքներ ունեցողներն ենք և մեկ անգամ արդեն ապացուցել ենք, թե ինչի ենք ունակ՝ մնացածը ձեզանից է կախված, ժողովուրդ ջան»,- խոսքն ավարտեց Ռոբերտ Քոչարյանը: