Ձեր վստահելի աղբյուրը

«Երբ ես պաշտոնը ստանձնեցի, Հայստանում ունեինք 8 հազար բաժանորդ, իսկ երբ հեռանում էի 2008 թվականին մենք ունեինք 480 հազար բաժանորդ, երկրի 90%-ից ավելին գազաֆիկացված էր և շատ ավելի առաջ էինք քան Ռուսաստանը»,- Ծաղկահովիտի բնակիչների հետ հանդիպման ժամանակ հայտարարեց ՀՀ երկրորդ նախագահ Ռոբերտ Քոչարյանը՝ լսելով գազաֆիկացման մասին բնակիչների բարձրացրած հարցադրումը:

Տեղեկանալով, որ համայնքում 5 հազար բնակիչ դեռ չունի բնական գազ՝ «Հայաստան» դաշինքի առաջնորդը հայտնեց, որ իր նախագահության տարիներին գազաֆիկացումն արագ տեմպերով էր առաջ գնացել և չգիտի, թե ինչու է հետագայում այն դանդաղել և ենթադրեց, որ այն կարող է կապված լինել 2009 թվականին գազի գնի թանկացման հետ:

Անդրադառնալով սահմանին ստեղծված իրավիճակին՝ ՀՀ երկրորդ նախագահը հայտարարեց, որ դրանք պետք է կահավորվեն, փշալարերով ապահովվեն, որպեսզի ընտանի կենդանիները չանցնեն սահմանը:

«Ես գտնում եմ, որ մենք շատ արագ նաև այդ սահմանին պետք է բավարար խտություն ձևավորենք, հակառակ դեպքում մենք ամեն քայլափոխի ունենալու ենք վտանգավոր պահեր»,- հայտարարեց «Հայաստան» դաշինքի ղեկավարը: