Ձեր վստահելի աղբյուրը

«ՀՀ երրորդ նախագահ Սերժ Սարգսյանի հրապարակած ձայնագրությունը բուռն քննարկումների առարկա դարձավ: Ցավում եմ՝ ոչ բոլորը հասկացան, թե ինչի մասին էր այդ ձայնագրությունը, բայց այն իր նպատակին ամբողջությամբ ծառայեց»,- ասուլիսում ասաց «Պատիվ ունեմ» դաշինքի ներկայացուցիչ Արմեն Աշոտյանը:

Նա նշեց, որ ձայնագրության նպատակն էր ապացուցել հետևյալ մի քանի դրույթ. «Այդ ձայնագրությունը վկայում է, որ Նիկոլ Փաշինյանը մեզանից, Սերժ Սարգսյանից ստացել է շատ լավ բանակցային ժառանգություն, այնպիսի  բանակցային ժառանգություն, ըստ որի, անգամ այդ կապիտուլյանտն է խոստովանում, որ Պուտինն ու այլոք իրեն ասել են՝ Ադրբեջանը շատ լավ հասկանում է, որ Արցախը այլևս երբեք չի լինելու Ադրբեջանի կազմում:

Սա էր ղարաբաղյան բանակցությունների կարևորագույն հիմնադրույթը մեր օրոք, մենք միշտ բանակցել ենք այն մասին, թե մենք ինչ ենք ստանալու և ստանում էինք մինչև 2018 թվականը՝ ներառյալ Արցախի կարգավիճակի ճանաչման գործընթաց:

Երկրորդ կարևոր հետևությունը, որ պետք է անել այդ  ձայնագրությունից. տգետ ու տհաս վիժվածքը դիտավորյալ տապալել է այդ բանակցային ժառանգությունը, դիտավորյալ մսխել է այդ բանակցային ժառանգությունը: Սա շատ կարևոր արձանագրում է, որովհետև դրանով է բերել պատերազմ Հայաստանի ու Արցախի գլխին:

Տապալելով կոնստրուկտիվ, հայամետ բանակցային գործընթացը, զրոյացնելով դրա փաստացի հայանպաստ արդյունքները, նա բերել է պատերազմ մեր գլխին, նորագույն պատմության մեջ կա 5000 եռաբլրյան խորշ, 10 հազար քառակուսի կորսված հայրենիք, 200-ից ավելի ռազմագերիներ, անհետ կորած անձինք: Սա քարոզարշավ չէ, սա վշտարշավ է, որովհետև այս իրավիճակում խոսել, մարդկանց դնել չորքոտանի երկարականջավորների տեղ, անբարոյականություն է և դրանով է զբաղված  գործող իշխանությունը:

Այդ ձայնագրությունն ապացուցեց մեկ այլ կարևոր հանգամանք, որ Փաշինյանը չի դադարել լինել մեր ռազմավարական դաշնակից ՌԴ-ի դեմ աշխատող գործիչ:

Ձայնագրության մեջ նա ասում է՝ ինձ տանում էին մի ճանապարհով, որի վերջը նորից Ապրիլյան պատերազմն էր՝ փաստացի մեղադրելով Ռուսաստանին Ապրիլյան պատերազմի մեջ նորից, փաստացի մեղադրելով ՌԴ-ին հնարավոր նոր պատերազմի մեջ:

Ձեզ թվում է՝ Ռուսաստանն այդ ձայնագրության ու Փաշինյանի իրական վերաբերմունքի մասին իմացել է Սերժ Սարգսյանի հրապարակած ձայնագրությունի՞ց: Կարծում եմ՝ ոչ ոք միամիտ չէ հասկանալու համար, որ եթե մենք ստացել ենք այդ ձայնագրությունը, ապա Փաշինյանի հակառուսական գործունեության մասին նմանատիպ տոննաներով կոմպրոմատ Մոսկվան ստանում է առ այսօր:

Հաջորդ կարևոր արձանագրումն այդ ձայնագրությունից. մեզ աշխարհին ներկայացրել է մարդ, որն իրեն դրել է գժի տեղ: Արդյոք աշխարհը մեզ լուրջ  կվերաբերվեր կամ լուրջ է վերաբերվել այս երեք տարիների ընթացքում, երբ որ տեսել է, որ  հայ ժողովուրդը միամտաբար իրեն առաջնորդ է  կարգել մի մարդու, ով գիժ է ձևանում ու գիժ է ներկայացնում Հայաստանն աշխարհին:

Սա նույնպես արցախյան վերջին արյունալի պատերազմի պատճառներից մեկն է, դրա համար մեզ աշխարհը չօգնեց, դրա համար մեզ Ռուսաստանը չօգնեց, քանի որ մենք գործ ունեինք մի մարդու հետ, ով տապալելով Հյաստանի բանակցային դիրքերը, խաչ քաշելով Արցախի կարգավիճակի հարցի վրա, խաբելով աշխարհի առաջնորդներին, անլուրջ ներկայացնելով մեզ ու ժողովրդին՝ բերեց պատերազմ մեր գլխին»:

Նա նշեց, որ երեկ հանրահավաքների ժամանակ Փաշինյանն ասել է՝ Արցախի կարգավիճակի հարց գոյություն չի ունեցել, ընդամենը տարածքների հանձնման խնդիր է եղել և այլ անբարոյական ստեր: Նա փաստաթղթեր հրապարակեց՝ ցույց տալով, որ Փաշինյանը խաբում է: