Ձեր վստահելի աղբյուրը

«1997 թվականին Կոտայքի մարզի բնակչության 62.4% աղքատ էր, իսկ 2007 թվականին աղքատների թիվը նվազել էր 2.1 անգամ՝ հասնելով 30%-ի: 1996 թվականին մարզում միջին աշխատավարձը 8667 դրամ էր, 2007 թվականին՝  68930 դրամ, այսինքն՝ այն այդ տարիներին մոտ 8 անգամ բարձրացել էր:1997 թվականին մարզում գործազրկության թիվը 13100 էր, իսկ 2007 թվականին 2.5 անգամ նվազել էր: Մանրածախ ապրանքաշրջանառությունը մարզում կազմել էր 16.4 մլրդ ՀՀ դրամ, իսկ 2007-ին 25.1 մլրդ դրամի էր հասել»,-Չարենցավանի բնակիչների հետ հանդիպմանը հայտնեց «Հայաստան» դաշինքի անդամ, ՀՅԴ ներկայացուցիչ Իշխան Սաղաթելյանը:

Նա շեշտեց, որ ՀՀ երկորդ նախագահ Ռոբերտ Քոչարյանի պաշտոնավարման տարիները բնութագրող այդպեսի ցուցանիշներ կարող է շատ երկար թվարկել, որոնք բնութագրում են այդ տարիներին ապահոված զարգացումը:

Իշխան Սաղաթելյանը հայտարարեց, որ դաշինքը գալիս է երկրում կայունություն, անվտանգություն և պաշտպանված սահմաններ ունենալու և յուրաքանչյուր քաղաքացու կենսամակարդակը բարելավելու համար:

«Մենք ասել ենք, որ 5 տարվա ընթացքում ապահովելու ենք առնվազն 3 մլրդ դոլարի օտարերկրյա ներդրումներ, ստեղծելու ենք արժանապատիվ աշխատավարձով աշխատատեղեր»,-ասաց Սաղաթելյանը և հավելեց, որ  դաշինքը նպատակադրված է ուսուցիչների, զինվորականների, դասախոսների, գիտնականների բուժաշխատողների կենսամակարդակը կարճ ժամանակում բարելավել, նաև բարձրացնել կենսաթոշակը և նվազագույն աշխատավարձը:

ՀՅԴ ներկայացուցիչը համոզմունք հայտնեց, որ հունիսի 20-ին ժողովրդի միջոցով «Հայաստան» դաշինքը կհեռացնի գործող իշխանություններին և կստեղծի ուժեղ և ապահով պետություն: