Ձեր վստահելի աղբյուրը

«1998 թվականին մենք ունեցել ենք ծայրահեղ աղքատության 21 %, 2008 թվականին՝ ընդամենը 3.1%՝ ավելի քան 6 անգամ նվազել է աղքատության տոկոսը»,-Չարենցավանում հայտարարեց «Հայաստան» դաշինքի առաջնորդ Ռոբերտ Քոչարյանը:

Շեշտելով, որ իր ղեկավարած դաշինքը գալիս է տնտեսության մեջ նման ցուցանիշները կրկնելու համար՝ ՀՀ երկրորդ նախագահը նշեց, որ առաջնային խնդիրն է լինելու նաև երկրի ներքին հանգստությունն ապահովելը, քանի որ բոլորը նյարդայնացած վիճակում են և այն խանգարում է պետություն կառուցելու աշխատանքներին:

Անդրադառնալով գործող իշխանություններին՝ ՀՀ երկրորդ նախագահը ժողովրդին կոչ արեց, որ երբ տեսնեն գոռգոռացող, լաչառություն անող մարդ, կամ մարդկանց, որը ձգտում է այդ որակներով ղեկավար դառնալ, պետք է նրան հեռու պահեն իրենցից, քանի որ նման անձը նույնիսկ 5 հոգանոց աշխատախումբ չի կարող ղեկավարել:

ՀՀ երկրորդ նախագահը հայտնեց, որ հնարավոր չէ առանց համերաշխության մթնոլորտի երկիր կառուցել, զարգացնել և ապագա ունենալ:

«Մի հայտնի մարդ ասել է, որ հեշտ է սվիններով իշխանությունը պահել բայց սվինների վրա նստելն հարմար չէ»,-նկարագրելով իշխանությունների ներկայիս վարքագիծը՝ ասաց Ռոբերտ Քոչարյանը, և հավելեց, որ ներկա իշխանությունն այն քաղաքական ուժը չէ, որը կարող է նույնիսկ մտածել վերարտադրվելու մասին:

«Հայաստան» դաշինքի ղեկավարը գործող իշխանությունների վարքագիծը բացատրեց  չարենցավանցիների հետ հանդիպումը խանգարելու համար այդ պահին դահլիճ մտած կնոջ գործողություններով.  «Պատկերացրեք, որ մենք ունենում ենք այսպիսի լեփ-լեցուն դահլիճ ու նման մի հանգամանք է լինում, որը խանգարում է հանդիպումը: Հիմա պատկերացրեք, որ այդ հանգամանքը ես լինեի, այստեղ նստած: Պարզ է, որ ամեն ինչ էր խառնվելու իրար, դահլիճը երկու մասի էր բաժանվելու և սկսելու էին իրար ծեծել: Այդպես էլ լինում է երկրի հետ, երբ նման մարդիկ են այն ղեկավարում»: