Ձեր վստահելի աղբյուրը

«Դուք երբևէ լսել եք իմ ընտանիքի, բարեկամի, հարազատի կողմից որևէ տեղ, որևէ լկտիություն կատարելու դեպքի մասին: Ոչ, չե՛ք լսել նման բան»,-պատասխանելով նախկին բարքերի վերադարձի մասին ժողովրդի անհանգստության վերաբերյալ քաղաքացու հարցին՝ Եղվարդում հայտարարեց Ռոբերտ Քոչարյանը և շեշտեց, որ 2008 թվականից հետո որևէ առնչություն չի ունեցել իշխանությունների հետ նույնիսկ շփումներ չի ունեցել, քանի որ շատ բաներ կային, որոնց հետո համաձայն չի եղել, հետևաբար՝ ողջ նախկինը իրեն վերագրելը սխալ է:

Նա նշեց՝ բացառում է իր թիմի կողմից նման դրսևորումներ թույլ տալը:

«Խստության տեսանկյունից ես բավարար կամք ունեմ, հետո խստությունս ո՞րն է, մի հատ նայում ես՝ մարդ իր տեղը նստում է»,- հայտարարեց «Հայաստան» դաշինքի ղեկավարը:

Դաշինքի անդամ Վահե Հակոբյանը չբացառելով նախկինում նման դեպքերի փաստը, խնդրեց ուշադրություն դարձնել, թե ինչ է կատարվում հիմա:

«Իրենք ինչպես են շրջում, 50-60 հոգանց անհայտ ծագման մարդիկ են և նրանք զինված են, իսկ ուժային մարմինները ոչ մի բան չեն անում այդ ուղղությամբ: Եթե մենք այսօրվա կատարվողի 0.3%-ը նախկինում անեինք՝ մեզ կախաղան էին բարձրացնելու»,- ընդգծեց Հակոբյանը:

Ռոբերտ Քոչարյանը հիշեցրեց դաշինքի խոստումը, որ կառավարական ամառանոցը դարձնելու են վերականգնողական կենտրոն:

«Սա նշանակում է, որ բարձրագույն պաշտոններ զբաղեցնող անձինք ապրելու են իրենց տներում, շփվելու են իրենց հարևանների հետ և նման իրավիճակում համը հանելը շատ ավելի դժվար է լինելու»,- շեշտեց Հայաստանի երկրորդ նախագահը և բերեց Անդրանիկ Մարգարյանի օրինակը, որը 7 տարի եղել է ՀՀ վարչապետ, ապրել է Ավանի իր բնակարանում և կիրակի օրերը հարևանների հետ նարդի էր խաղում:

Նկատելով, որ ոստիկանության 2000 աշխատակից սպասարկում է մեկ մարդու՝ Ռոբերտ Քոչարյանն ասաց, որ ոստիկանությունը նման գործառույթ չունի, դրա համար կա Պետական պահպանության ծառայություն, որն էլ այն պետք է ապահովի, իսկ ոստիկանությունը դարձել է անձնական թիկնապահ:

Նա հայտնեց, որ ընտրություններից հետո հաշվելու են, թե վերջին մեկ տարվա ընթացքում մեկ մարդու անվտանգությունն ապահովելու համար, ինչ ծախսեր են կատարվել, ժողովուրդը կտեսնի, թե ինչ հսկայական գումարներ են վատնվել:

«Ինձ մեր դաշինքի շտաբներից ասել են, որ մարդկանց նախկիններով վախեցնում են և ամբողջ նախկին ժամանակահատվածը կապում են իմ հետ»,- ասաց Ռոբերտ Քոչարյանը:

ՀՀ երկրորդ նախագահը հիշեց, որ իր մի բարեկամը ԵՊՀ-ում սովորելու ժամանակ մի սխալ էր թույլ տվել և ինքը ազատել էր նրան համալսարանից և ուղարկել Հորադիզ ծառայելու՝ ասելով, որ քանի դեռ խելքի չի եկել պատժվելու է:

«Եթե դու քո շրջապատի, բարեկամների հանդեպ խստապահանջ չես, ապա չես կարող երբեք ուրիշներից ինչ-որ մի բան պահանջել, չի լինում այդպես»,- հայտարարեց «Հայաստան» դաշինքի առաջնորդը: