Ձեր վստահելի աղբյուրը

Նախընտրական շրջանում ակտիվացավ ևս «նախկինների թալանի» հարցերը, մասնավորապես, կրկին շրջանառվում է 4 միլիարդ դոլարի առասպելը, որ նաև ուրիշ թվերի տեսք է ընդունում՝ կախված, թե ով է այս մասին մեկնաբանում, կամ խոսում։ 4 միլիարդ դոլարը նորից կապվում է Ռոբերտ Քոչարյանի անվան հետ, թեպետ գոնե այս երեք տարվա մեջ գործող իշխանությունը չներկայացրեց հանրությանը ոչ մի փաստ:

Հիշեցնենք, որ այս շրջանառվող լուրը հերքվեց՝ նախագահ Ռոբերտ Քոչարյանին և նրա ընտանիքի անդամներին վերագրվող՝ Հայաստանի չափանիշներով գերահռելի կարողությունից՝ գրեթե 30 անուն ընկերություններից ու ձեռնարկություններից… միայն 1 ձեռքի ոչ լրիվ մատների վրա հաշվելիք ընկերություններ… որոնց բաժնետեր լինելու փաստը Քոչարյան ընտանիքի ներկայացուցիչները երբեք չեն էլ թաքցրել:

Երկրորդ նախագահ Ռոբերտ Քոչարյանին նման ահռելի կարողություն վերագրելու մասին հրապարակումը եղել է նրա պաշտոնավարման ավարտից գրեթե երկու տարի անց: Հրապարակումը եղել է ռուսական «Վերսիա» թերթում, 2010 թվականի հունվարի 30-ին:

Հորինվածքը բավականին պարզունակ էր. ինչ-որ մեկը չէր ալարել և մի քանի տասնյակ ընկերություններ, որոնք ստեղծվել, արդիականացվել կամ որոնցում խոշոր ներդրումներ էին ներգրավվել նախագահ Ռոբերտ Քոչարյանի նախագահական պաշտոնավարման շրջանում (1998-2008): Ո՛չ մի փաստ, ո՛չ մի հիմնավորում:

Պարզ թվարկում և ուրիշ ոչի՛նչ: Հրապարակման մեջ թվարկված «ունեցվածքի» մոտավոր գնահատականով՝ հենց հեղինակներն իրենց թվարկած բիզնեսների համախառն ունեցվածքը գնահատել էին 4 միլիարդ դոլարից մի քիչ ավելի:

Նշված հրապարակումը գերազանցապես հիմնված է եղել Սմբատ Կարախանյանի պատմածների վրա, որ 2010 թվականին Մոսկվայում «Հայ ազգային միաբանություն» ակումբի ղեկավարն էր և  սերտ կապերի մեջ է եղել ՀԱԿ-ի հետ։ 

Նշված հրապարակումը ակտիվորեն սկսեցին շրջանառել ինչպես Նիկոլ Փաշինյանի ընտանեկան թերթ «Հայկական ժամանակը», այնուհետև՝ մի շարք այլ թերթեր ու կայքերում, որոնցից ոչ մեկը չփորձեց սեփական հետաքննություն անցկացնել:

Երբ արդեն իշխանության հասած Փաշինյանի ջանքերով երեք տարի առաջ այդ թեման նորից ակտիվացվեց, «Երևան թուդեյ» կայքն անցկացրեց լրագրողական հետաքննություն՝  պաշտոնական նամակով հարցում ուղարկելով. արդյո՞ք երկրորդ նախագահը կամ նրա ընտանքի անդամները որևէ բաժնեմաս ունե՞ն տվյալ ընկերություններում:

Ըստ պաշտոնական պատասխանների հարցման արդյունքների՝ Ռոբերտ Քոչարյանի և նրա ընտանիքի անդամների հետ կապ չունեն և չեն ունեցել հրապարակման մեջ նշված ձեռնարկությունները՝ «Կոնվերս բանկ», «Արդշինբանկ», «Հայբիզնեսբանկ», «Յունիբանկ», «Զանգեզուրի պղնձամոլիբդենային կոմբինատ», «Երևանի Արարատ կոնյակի-գինու-օղու կոմբինատ», «Գոլդեն Փելիս» հյուրանոց, «Էրեբունի» հյուրանոց, «ՎիվաՍել-ՄՏՍ», «Նաիրի» բժշկական կենտրոն, «Ղարաբաղ Տելեկոմ», «Ռոբերտո» կոշիկների խանութների ցանց, «Արարատցեմենտ», «Արմենիա միջազգային օդանավակայաններ», «ԶԵԹ ԸՆԴ ԷՅ», «Ռենկո ՍպԱ», «Հայկական երկրորդ հեռուստաալիք», ՄԱՊ ընկերություն, «Ագարակի պղնձամոլիբդենային կոմբինատ», «Արցախ Բանկ» և «ՍԱՍ սուպերմարկետներ»-ը։

Այսպիսով՝ հրապարակման հեղինակների հաշվարկած գումարային 4 միլիարդը չի էլ պատկանել Ռոբերտ Քոչարյանին։

Հետաքննությամբ և պաշտոնական պատասխաններով հաստատվեց առանց այն էլ ոչ թաքուն փաստ. Ռոբերտ Քոչարյանի ընտանիքի անդամները, հիմնականում՝ բիզնեսով զբաղվող ավագ որդին մասնաբաժին ունեն տվյալ ընկերություններում, մասնավորապես՝ «Կապուտակ Սևան», «Տոյոտա Երևան», «Գրիտտի» ՍՊԸ (Ստեֆանո Ռիչչի խանութ), «Ֆասթ Քարթ» ՍՊԸ (Play City, «Cityzen»), «Բեստ Վեստեռն Կոնգրես» հյուրանոց (ամբողջական բաժնետերերն են՝ Ս․ Քոչարյան, Գ․ Քոչարյան, Լ․ Քոչարյան), «Նաիրի ինշուրանս» ապահովագրական ընկերություն:

Նախագահ Ռոբերտ Քոչարյանը, նույն 2018 թվականին, «Երևան թուդեյին» տված հարցազրույցում անդրադառնալով այդ հարցին, մասնավորապես ասել է.

«Ես անձամբ բիզնեսով երբեք չեմ զբաղվել: Իմ ընտանիքի անդամները 15-16 տարի զբաղվում են բիզնեսով, երբեք պետական պաշտոններ չեն զբաղեցրել, զբաղվում են բիզնեսով և որոշակի հաջողությունների հասել են: Բայց ինչ-որ ունի իմ ընտանիքը, իմ ընտանիքի անդամները, կամ ստեղծված է զրոյից, կամ գնված է օրինական ճանապարհով: Բոլորը գրանցված են Հայաստանի Հանրապետության պետռեգիստրում, և այստեղ որևէ գաղտնիք չկա»: