Ձեր վստահելի աղբյուրը

«Մենք ունենք փորձառու թիմ, պատրաստակամ մարդիկ, կամք, վճռականություն, գիտենք ինչ բեռի տակ ենք մտնում և ձեր օգնությամբ, մասնակցությամբ պետք է հունիս 20 -ին հեռացնենք այս չարիքի կառավարությանը, որպեսզի փրկենք մեր երկիրը»,- Ստեփանավան քաղաքի մշակույթի պալատում  քաղաքացիների հետ հանդիպմանն ասաց «Հայաստան» դաշինքի առաջնորդներից, ՀՅԴ ԳՄ ներկայացուցիչ Իշխան Սաղաթելյանը։

Նա նշեց, որ իրենց ամեն լավ հանդիպումից հետո վարչապետի աթոռը  զբաղեցնող անձը նոր ջղաձգումներ է ունենում։

«Երեկվա մեր փայլուն հանդիպումներից հետո ենթադրվում էր, որ այսօր նոր ջղաձգումներ կունենա։ Քիչ առաջ ինչ-որ նոր հայտարարություններ է արել։ Մենք աշխատում ենք դրանց չանդրադառնալ, խոսել մեր երկրի երաշխավորված ապագայից և մեր անելիքներից»,- ասաց Ի. Սաղաթելյանը։

Միաժամանակ մեկ հարցի վրա հրավիրեց ներկաների ուշադրությունը. «Այս մարդը  հետևողական թշանամություն է մտցնում մեր ժողովրի մեջ, ըստ էության, պատերազմ է հայտարարել ժողովրդի այն հատվածին, ով փորձում է  մաս չդառնալ իր դավաճանությանը։  Այսօր կրկին հայտարարել է հոգևոր էլիտայի դեմ պայքարելու, նրանց վռնդելու մասին։

Մեկ անգամ ևս կոչ ենք անում այդ խելագար դավաճանին հեռու մնալ Հայ Առաքելական սուրբ եկեղեցուց, հայ հոգևորականից, մեր ազգային արժեքներից և չփորձել ամեն ինչ կեղտոտել ու վարկաբեկել։ Այս չարիքը պետք է հեռու մնա մեր կարևոր արժեքներից։

Այս մարդն ասում է  ժողովուրդը ես եմ, երկրում չպետք է լինի էլիտա՝ գիտական, մտավորական, կրթական, զինվորական և իրեն նույնացնելով ժողովրդին՝ փորձում է ասել ժողովրդի հավաքական կերպարն է։

Էն որ խոտերի մեջ հարբած գինու շիշը դոշին պառկած փորձում է ցույց տալ, որ ժողովուրդ ջան ձեզանից մեկն եմ, դա այդպես չէ։ Մեր ժողովրդի հավաքական կերպարը ստեղծող, աշխատասեր, կառուցող հայ մարդն է, ինքը պարզապես փողոցային հարբեցող է, չի կարող նույնանալ մեր ժողովրդի հետ»։

Իշխան Սաղաթելյանն ընդգծեց՝ հայ մարդն ունի երաշխավորված ապագա և այդ ապագան առանց նիկոլզիմի է։

«Հունիսի 20-ին միասին հեռացնենք այս չարիքի  կառավարությանը, և կերտենք մեր երազանքների հայրենիքը։

Դեպի ուժեղ Հայաստան»,- ստեփանավանցիների հետ հանդիպմանն իր ելույթում ասաց Իշխան Սաղաթելյանը։