Ձեր վստահելի աղբյուրը

Իշխանափոխությունից հետո Պետական վերահսկողությաւն ծառայության ղեկավարի պաշտոն ստացած, ապա քրեական գործի հետևանքով պաշտոնից զրկված Դավիթ Սանասարյանն արտահերթ ընտրություններին մասնակցում է իր ստեղծած «Ինքնիշխան Հայաստան» կուսակցությունով։

ԿԸՀ պաշտոնական էջում հրապարակված ընտրական ցուցակում 85 թեկնածու է ներկայացվել, նրանցից մեկի գրանցումը ԿԸՀ-ն մերժել է։

Ցուցակը գլխավորում է Դավիթ Սանասարյանը, նրան հետևում են Ժուրեմ Պողոսյանն ու Նարինե Մարտիրոսյանը։ Երեքն էլ  կուսակցական։ Ցուցակում 85 գրանցված թեկնածուներից վեցն են անկուսակցական, մյուսները «Ինքնիշխան Հայաստան» կուսակցությունից են։

Թեկնածուների 44-ի անվան դիմաց նշված է՝ չի աշխատում։

Ցուցակի 7-րդ համարում Նորակերտի համայնքապետ Արման Պետրոսյանն է։

Թեկնածուների թվում են անհետ ձեռներեցներ, ուսուցիչներ, մարզիչ, լիցքավորող, «Հայբուսակ»-ի փոխտնօրենը, նրա օգնականը, երկու ուսանող նույն համալսարանից, Հայբուսակ համալսարանի Գյումրու մասնաճյուղի  տնօրենը, Հայբուսակ համալսարանի վարորդը, Հայբուսակ համալսարանի որակի բաժնի տնօրենը։

Ցուցակում «Հայբուսակ»-ի բարձր ներկայացվածությունը միգուցե պայմանավորված է այն հանգամանքով, որ Դավիթ Սանասարյանի կինը՝ Սոնա Հովհաննիսյանն այդ համալսարանի պրոռեկտորն է։  

Ցուցակի 14-րդ տեղում Մարտուն Ադամյանն է, նա Վանաձորում գործող «Հրայր և Արամ» ՍՊԸ-ում որպես թթվածնի լիցքավորող է աշխատում։

Ցուցակի 30-րդ հորիզոնականում կուսակցական Ցահե Մաիլյանն է, որը Գոլդս Ջիմ ֆիտնես կենտրոնի  մարզիչ է։

Թեկնածուները մեծ մասմաբ Երևանից են ու Գյումրիից։ Հիշեցնենք, որ «Ինքնիշխան Հայաստան»-ը 26-րդ քվեաթերթիկն է։