Ձեր վստահելի աղբյուրը

«Սպիտակցիներն ավելի լավ են հասկանում, թե ինչ է նշանակում ճգնաժամային իրավիճակում ունենալ ունակ կառավարություն, եթե 80-ական թվականներին փլատակների մեջ էր Լոռին և Շիրակը, ապա հիմա փլատակների մեջ է ամբողջ Հայաստանը»,-Սպիտակի բնակիչների հետ հանդիպմանը հայտնեց «Հայաստան» դաշինքի անդամ «Վերածնվող Հայաստան» կուսակցության ղեկավար Վահե Հակոբյանը և հավելեց, որ դաշինքը համապատասխանում է ճգնաժամային կառավարության չափանիշներին:

Նա հայտնեց, որ իշխանություններն արդեն պարտվել են և սադրանքների են գնում՝ մարդկանց  հարբեցնում և ուղարկում են ժողովրդի մեջ սադրանքներ անելու:

Վահե Հակոբյանը հայտարարեց, որ ներկայում իշխանությունները ճնշման տակ են դրել գրեթե բոլոր համայնքի ղեկավարներին, դպրոցի տնօրեններին, բուժկենտրոններիր ղեկավարներն:

«Բայց իրենց էջն արդեն փակված է, ժողովուրդ ջան, որը երևում է նրանց վարկանիշի անկումից, և շատ փոքր զանգված է մնացել իշխանությունների կողքին»,- հայտարարեց  «Հայաստան» դաշինքի անդամը և ներկաներին հորդորեց մոլորյալ քաղաքացիների հետ խոսել և դարձի բերել:

Նկատելով, որ Սպիտակի շենքերի 99 տոկոսը կառուցվել են Ռոբերտ Քոչարյանի օրոք ՝ Վահե Հակոբյանը հավելեց. «Մեր գալուց հետո նման վիճակ է տիրելու ամբողջ հանրապետությունում, այն դարձնելու ենք շինհրապարակ, ունենալու ենք ուժեղ բանակ, որովհետեև մենք պետք է թելադրենք օրակարգը, ոչ թե մեր թշնամիները, առողջ տնտեսություն ենք ունենալու, համաչափ զարգացնելու ենք մարզերը»:

Ավարտելով խոսքը՝ Հակոբյանը շեշտեց, որ հունիսի 20-ին ժողովրդի հետ միասին փակելու են  նիկոլիզմի էջը և բացելու են նոր ուժեղ Հայաստանի էջը: