Ես ձեզ շատ եմ կարոտել, երկար ժամանակ է չեմ հանդիպել ձեզ, շատ ուրախ եմ, որ չեք մոռացել այստեղ արված աշխատանքը. Ռոբերտ Քոչարյանը՝ սպիտակցիներին

Քաղաքական 12:39 12/06/2021 Հայաստան

Ես ձեզ շատ եմ կարոտել, երկար ժամանակ է չեմ հանդիպել ձեզ, շատ ուրախ եմ, որ չեք մոռացել այստեղ արված աշխատանքը. Ռոբերտ Քոչարյանը՝ սպիտակցիներին

Սպիտակ քաղաքի բնակիչների հետ հանդիպման ժամանակ «Հայաստան» դաշինքի առաջնորդ, ՀՀ երկրորդ նախագահ Ռոբերտ Քոչարյանն ասաց, որ հիշում է Սպիտակի յուրաքանչյուր շենքի կառուցումը, դրանց վրա աշխատող յուրաքանչյուր շինարարի դեմքը:

«Շինարարության ծավալները մեծացնելու ամենախթանիչ ուժը եղել է այն, թե հաջորդ անգամ Սպիտակ գալուց, այդտեղ ապրող մարդկանց աչքերին ինչպե՞ս եմ նայելու: Նամուսի, պատասխանատվությա հարց էր իմ համար Աղետի գոտու վերականգնումը, երբ այն տարիներին գումարները շատ ավելի քիչ էին»,- հայտարարեց «Հայաստան» դաշինքի առաջնորդը:

Նրա խոսքով՝ գումարները քիչ էին, բայց աշխատողի վրա միշտ գումար էր գալիս, նոր հնարավորություններ էին բացվում և իրենց աշխատանքը խրախուսեց բազմաթիվ մարդկանց և սփյուռքում և, նույնիսկ, ոչ հայերին՝ օժանդակելու Աղետի գոտու վերականգնմանը:

Ռոբեչտ Ոոչարյանը վերհիշեց, որ իր պաշտոնավարման տարիներին աղետի գոտում կառուցվել են շատ թաղամասեր, բնակելի տներ, դպրոցներ և դիմեց սպիտակցիներին. «Հիմա իմ մոտ շատ բնական հարց է առաջանում, եթե երեք տարի Սպիտակ քաղաքում ոչինչ չի արվել կառավարության կողմից, ինչ երեսով են նրանք գալիս ձեր մոտ, կազմակերպում հանրահավաք այս նույն հրապարակում և դիմում ձեզ՝ ձեր վստահության քվեն ստանալու համար: Մեկը կարող է բացատրել, թե ի՞նչ խղճով է դա արվում»:

«Հայաստան» դաշինքի առաջնորդի խոսքով՝ ներկայիս իշխանությունը Հայաստանըն ավերակների է վերածում և իր առաջնորդած թիմը գալիս է որպեսզի ապահովի անվտանգ երկիր, տնտեսության վերականգնում և հանգստություն քաղաքացիներին:

«Հիմա ասում եմ, որ դուք հունիսի 20-ից հետո տեսնելու եք մի կառավարություն, որի համար նամուսի հարց է լինելու ամեն անգամ այստեղ գալուց պարզերես նայել ձեր աչքերին և ասել՝ թե ամեն տարի ինչ ենք արել, դա է լինելու մեր նպատակը»,- հայտարարեց Ռոբերտ Քոչարյանը և հավելեց.«Ես ձեզ շատ եմ կարոտել, երկար ժամանակ է չեմ հանդիպել ձեզ, շատ ուրախ եմ, որ չեք մոռացել այն աշխատանքը, որն այստեղ արվել է և վստահեցնում են ձեզ, սիրելի սպիտակցիներ, ամեն ինչ շատ լավ է լինելու»:

Քաղաքացիների հետ հանդիպումից հետո «Հայաստան» դաշինքի ներկայացուցիչները հարգանքի տուրք են մատուցել Սպիտակի երկրաշարժի անմեղ զոհերի հիշատակին՝ ծաղիկներ դնելով նրանց հիշատակն հավերժացնող հուշակոթողի մոտ:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: