Ձեր վստահելի աղբյուրը

«Այսօր կոռուպցիայի կանխարգելման մարմնի նշանակումը քաղաքական  է, այդ պատճառով նույնիսկ բուռն ցանկության դեպքում չեն կարող պատշաճ իրականացնել իրենց գործառույթը»,-այս մասին այսօր լրագրողների հետ հանդիպմանը հայտնեց  «Հայաստան» դաշինքի ներկայացուցիչ, ԱԺ նախկին փոխխոսնակ, ՀՀ արդարադատության նախկին նախարար Արփինե Հովհաննիսյանը։

Նա նաև ներկայացրեց կոռուպցիայի դեմ պայքարին և իրավական քաղաքականության մի շարք կարևոր հարցերին առնչվող դաշինքի ծրագիրը՝ կոռուպցիայի դեմ պայքար և հակահոռուպցիոն քաղաքականություն, մատչելի և  որակյան արդարադատություն, մարդակենտրոն վարչարարություն:

«Մենք առաջարկում ենք արդյունավետ պայքար կոռուպցիայի դեմ, որը նշանակում է ոչ թե կոռուպցիայի դեմ պայքարող մարմինների թվաքանակի արհեստական ավելացում, այլ նշանակում է որակի բարձրացում՝ քաղաքական նշանակումների բացառմամբ և քաղաքական կամքի հստակ ուրվագծման միջոցով։ Մենք առաջարկում ենք մարդակենտրոն վարչարարություն»,– ասաց նա

Նախկին նախարարը նաև ընդգշեց, որ  դա նշանակում է մարդկանց քաշքշուկների մեջ չգցել։

Արփինե Հովհաննիսյանի կարծիքով,  Կոռուպցիայի կանխարգելման հանձնաժողովը քաղաքականացված, ընտրանքային մոտեցում ունի  կոնկրետ քաղաքական իշխանության ներկայացուցիչների նկատմամբ։ Որպես օրինակ բանախոսը նշեց. «Մասնավորապես, 2020-ին հարուցվել է վարույթ կոնկրետ նախարարներից մեկի կողմից իր կնոջ ընկերությունից մեկ աղբյուրից գնման եղանակով պետպատվերի պատվիրակում, բայց այնտեղ Կոռուպցիայի կանխարգելման հանձնաժողովը շահերի բախում չի հայտնաբերել»։

«Հայաստանում կոռուպցիայի դեմ պայքարը դարձել է իմիտացիա, քաղաքական գործիք, հետևաբար, ՀՀ-ում կոռուպցիայի դեմ արդյունավետ պայքարի մասին չենք կարող խոսել»,-եզրակացրեց նա։