Ձեր վստահելի աղբյուրը

«Լավ աշխատող կառավարությունը նա է, որի մասին քաղաքացին չի էլ լսում»,- Էջմիածնի բնակիչների հետ  հանդիպմանը հայտարարեց «Հայաստան» դաշինքի առաջնորդ, ՀՀ երկրորդ նախագահ Ռոբերտ Քոչարայանը և հավելեց, որ եթե քաղաքացին ոռոգման ջրի կամ այլ խնդիրներ չունենար, ապա կառավարության տեղը չպետք է իմանար, իսկ վերջին 3 տարիների ընթացքում գործադիրի շենքի դիմաց ցույցեր շատ են եղել:

Ըստ Ռոբերտ Քոչարյանի, եթե ժողովուրդն ամեն օր հիշում է կառավարությանը, ապա այն նշանակում է, որ վերջինս իր գործը լավ չի անում, խնդիրները շատ են:

«Ժամացույցի նման աշխատող պետական համակարգը պետք է աննկատելի լինի, բայց ձեր կյանքում նրա արած գործը պետք է ամեն օր նկատելի լինի»,- ասաց դաշինքի առաջնորդը և ցավով նկատեց, որ գործող կառավարության անճարությունը, անկարողությունը բերել է ողբերգության, պատերազմի, կորուստների:

Նա հայտարարեց, որ իր ղեկավարած թիմը պատրաստ է կանգնեցնել երկրի գահավիժումը և զբաղվել քաղաքացիների հոգսերով, անել ամեն ինչ, որ շատ կարճ ժամանակահատվածում բոլորը կզբաղվեն իրենց գործերով, այլ ոչ թե՝ կառավարության:

«Եթե դուք ամեն օր հիշում եք կառավարությանը, ուրեմն լրջագույն հիմնահարցերի առաջ է կանգնած երկիրը»,-շեշտեց Ռոբերտ Քոչարյանը և պնդեց, որ կառավարության գործն էլ պետք է լինի քաղաքացու աշխատանքի արդյունավետության ապահովումը:

Հայտարարաելով, որ «Հայաստան» դաշինքն այն  թիմն է, որը կարող է վերականգնել քաղաքացու վստահությունը կառավարության նկատմամբ՝ ՀՀ երկրորդ նախագահը դիմեց էջմիածինցիներին, որպեսզի հունիսի 20-ին բոլորը միասին վերջ տանք ձախողված իշխանությանը: