Ձեր վստահելի աղբյուրը

«Հայաստանի բոլոր մարզերում և Երևանի վարչական շրջաններում «Պատիվ ունեմ» դաշինքի քարոզարշավը անցնում է գերազանց, շատ լավ»,- ամփոփելով քարոզարշավի առաջին շաբաթը՝ ասաց «Պատիվ ունեմ» դաշինքի ներկայացուցիչ Արսեն Բաբայանը:

Նրա խոսքով, բոլոր տեղերում հանդիպելով քաղաքացիների հետ, մեկ անգամ ևս համոզվում են, որ այս իշխանություններին հեռացնելն առաջնահերթություն է, բոլոր տեղերում համոզվում են, որ այս իշխանությունը վերարտադրվելու հնարավորություն որևէ կերպ չունի:

«Քարոզարշավի ընթացքում մեր ռեյտինգի աճն ամենևին դուր չի գալիս այս իշխանություններին և դա է պատճառը, որ վերջին օրերին հատկապես մեր դաշինքի ներկայացուցիչների նկատմամբ իրականացվում են քաղաքական ուժեղ ճնշումներ: Դրա վառ օրինակն է վերջերս Ռուբեն Խլղաթյանի նկատմամբ իրականացվող քաղաքական հետապնդումը, թե իբր նա ընտրակաշառք  բաժանելու կամ տալու ինչ-որ անհեթեթ դեպքի հետ առնչություն ունի»,- նշեց նա։

Ըստ Արսեն Բաբայանի, տևական ժամանակ է, ինչ այս իշխանությունները տարբեր պատրվակներով փորձում են իրենց անդադար հրավիրել քննչական մարմիններ, վեր հանել նոյեմբերից սկսած ինչ-որ քրեական գործեր, որոնցով մինչ օրս որևէ գործողություն չէր իրականացվում:

«Հիմա այդ գործերով հրավիրում են քննչական բաժիններ, արգելանքների միջոցով մեր հաշիվներն են փակում», - ասաց «Պատիվ ունեմ» դաշինքի ներկայացուցիչը:

Արսեն Բաբայանն ընդգծեց՝ այդպիսով փորձում են կասեցնել իրենց հաջողված քարոզարշավը, ինչը սակայն չի ստացվում և չի էլ ստացվելու։

Խոսելով իշխանության քարոզարշավի ընթացքում հնչած հայտարարությունների մասին, նա նշեց, որ իշխանությունն իրենց քարոզչության ընթացքում անդադար ատելություն է տարածում, խորացնում է այդ ատելությունը, որը սկսվել էր դեռ իրենց իշխանության գալու շրջանում:

«Ամեն օր հասարակության մեջ ատելության նոր չափաբաժին է ներարկվում, իմ համոզմամբ, շատ լավ հասկանալով, որ որևէ դեպքում հնարավորություն չունեն վերարտադրվելու: Պատրաստվում են իրենց պարտությունը ներկայացնել հաղթանակ: Չեմ բացառում, որ  իշխանությունը կանգնի ու ասի, որ ընտրությունները կեղծել էին ընդդիմադիրները: Երբևէ նման բան չի լսվել: Բայց այս իշխանությունը պատրաստ է նույնիսկ այդ հիմարագույն մեթոդով իշխանությունը կրկին անգամ ուզուրպացնել»,- ասաց «Պատիվ ունեմ» դաշինքի ներկայացուցիչ Արսեն Բաբայանը: