Ձեր վստահելի աղբյուրը

«Բացարձակ դատարակություն պրոֆեսիոնալիզմի և կազմակերպչական ունակությունների տեսանկյունից և բացարձակ դատարկություն բարոյական տեսանկյունից»,- նկարագրելով գործող իշխանություններին Մասիս քաղաքում հայտնեց «Հայաստան» դաշինքի առաջնորդ Ռոբերտ Քոչարյանը և շեշտեց, որ այսօր պայքարը գնում է նրանց և «Հայաստան» դաշինքի մեջ:

Ըստ Ռոբերտ Քոչարյանի՝ ճիշտ ընտրություն կատարելու համար, պետք է զգացմունքայնությունը մի կողմ դնել և սթափ տեսնել, թե որ թիմը ինչ է ասում և արել:

Շեշտելով, որ մարդու բարոյականության ցուցիչներն են նրա խոսքը և գործը, կատարած սխալների համար ներողություն հայցելու ունակությունը՝ դաշինքի ղեկավարն ասաց. «Այս իշխանությունը խոստացել էր խաղաղություն՝ ստացանք պատերազմ, զոհեր, տարածքային հսկայական կորուստներ՝ 5 հազարից ավելի զոհ, 11 հազարից ավելի վիրավոր և իշխանությունը չի ընդունում, որ այս ամենի մեջ մեղք ունի»:

Հիշելով Նիկոլ Փաշինյանի հայտնի խոսքն այն մասին, թե ունի կախարդական փայտիկ և ապահովելու է թռիչքաձև աճ՝ Ռոբերտ Քոչարյանը  նկատեց, որ երեք տարում հանրապետությունում արձանագրվել է տնտեսության թռիչքաձև անկում, գործազրկության աճ, արտագաղթ, աղքատության աճ:

«Այս իշխանությունները խոստացել էին կոռուպցիայի դեմ պայքար, բայց այսօր թաթախվել են կոռուպցիայի մեջ և իրենց այդ պայքարում մինչև օրս չկա կոռուպցիոն բնույթի որևէ մեկ օրինական ուժի մեջ մտած դատավճիռ»,- հայտարարեց «Հայաստան» դաշինքի առաջնորդը և բերեց «Սպայկա» ընկերության օրինակը:

Նա հիշեցրեց, որ երբ կալանավորեցին «Սպայկա» ընկերության սեփականատիրոջը, մեծ աղմուկ բարձրացրին և 7 մլրդ դրամի տուգանքներ նշանակեցին՝ իբր բյուջե չի մուծվել, հետո բաց թողեցին, որից հետո շատ փոքր գումար մուծվեց բյուջե, իսկ այսօր այդ անձը հայտնվել է ՔՊ-ի ցուցակում  և սա այն «Սպայկա» ընկերությանն է, որը իշխանական թերթերով վերագրում էին իրեն:

«Թերթերով գրել էին, որ «Սպայկա» ընկերությունը Ռոբերտ Քոչարյանինն է, հարձակվում են նրա վրա, տուգանք են գրում, հետո այդ տուգանքը ջրվում է, թե ում գրպաններով է ջրվում  անհասկանալի է, և հետո այդ մարդը հայտնվում է իրենց քաղաքական թիմում, ցուցակներում»,-հայտարարեց Ռոբերտ Քոչարյանը և հավելեց, որ կարող է 10-ից ավելի նման օրինակ բերել:

Նրա խոսքով՝ այն կոռուպցիայի դասական օրինակ է, և այդ մարդիկ չունեն ամոթի զգացում, չունեն նամուսի որևէ նշույլ, խրվել են կոռուպցիոն գործարքների մեջ և այս ընթացքում մուրճը ձեռքին մարդկանց խփելու, ասֆալտին փռելու հայտարարություններ է անում:

ՀՀ երկրորդ նախագահն ասաց, որ Փաշինյանի մուրճով նկարներն իր մոտ ասոցացվում է մոլեռանդ սոցիոպատի կերպարի հետ:

«Մյուս կողմում էլ «Հայասան» դաշինքն է, որն ասում է՝ չի գալիս մուրճով գլուխ ջարդելու, այլ գալիս է երկիրը շենացնելու»,- հայտարարեց Ռոբերտ Քոչարյանը և նկատեց, որ իր առաջնորդած դաշինքի ցուցակում չկան վարկաբեկված մարդիկ, որոնց մասին կարելի է ասել, որ սուտասան կամ անբարոյական են և ժողովուրդը պետք է ընտրություն կատարի այս երկուսի միջև:

ՀՀ երկրորդ նախագահը, հիշելով, որ երեք տարվա ընթացքում 5 ԱԱԾ  և 4 ԳՇ պետ է ազատվել աշխատանքից, եզրակացրեց, որ անվտանգային սպառնալիքի պայմաններում նման վարքագիծը կամ հոգեկան խանգարման դրսևորում է, կամ թշմանական մտածված քայլ՝ անվտանգության կառույցները քայքայելու համար:

Հավելելով նաև, որ ներկայում Հայաստանում արտգործնախարոթյուն էլ չի գործում և չկան մի շարք կարևոր նախարարություններ՝ «Հայաստան» դաշինքի առաջնորդը հայտարարեց, որ եթե այդքանից հետո Նիկոլ Փաշինյանին ձայն են տալիս, ուրեմն պարգևատրում են և հակազդման միակ միջոցը նրա դեմ քվեարկելն է:

«Եթե քվեարկում եք իշխանության կողմ, նշանակում է խրախուսում եք, ասում եք՝ ուռա, լավ եք արել, ապրեք, մենք էլ ենք այդ զոհերի համար պատասխանատվությունը կիսում ձեր հետ»,- խոսքն ամփոփեց ՀՀ երկորդ նախագահը: