Ձեր վստահելի աղբյուրը

Մեր համարը 24-ն է, ինչը նշանակում է աշխատել 24 ժամ։ Այս մասին Արտաշատում «Հայաստան» դաշինքի հանդիպման ընթացքում ասաց ՀՀ երկրորդ նախագահ, դաշինքի առաջնորդ Ռոբերտ Քոչարյանը։

«Ուրեմն վստահ եղեք, որ բացի հանրապետական այլ հարցերից, զբաղվելու ենք նաև Ձեր առօրեա հարցերով։ Անելու ենք ամեն ինչ՝ Ձեր բեռը թեթևացնելու և կյանքի որակը բարելավելու համար։ Սա է մեր նպատակը»,- ասաց Քոչարյանը։

Նրա գնահատմամբ՝ այս ընտրություններն ու նաև քարոզարշավը յուրահատուկ են և նշեց, որ իշխանությունը պահում է իրեն որպես ընդդիմություն, իսկ ընդդիմությունը՝ որպես իշխանություն։

«Քարոզարշավի որակով, օգտագործվող բառապաշարով, շարժումներով, հոգեվարքերով այս իշխանությունն, իմ տպավորությամբ, արդեն թրեյնինգի մեջ է՝ ընդդիմադիր դառնալու համար։ Ընտելանում են, այսպես ասեմ, նախօրորք սկսել են հարմարվել իրենց ապագա կարգավիճակին։ Ողջունում եմ դա»,- ասաց նա։

Ինչ վերաբերում է «Հայաստան» դաշինքին, ապա Քոչարյանի խոսքով, ցույց են տալիս թիմն աշխատում է ժամացույցի պես, ինչը բնորոշ չէ սովորաբար ընդդիմադիր ուժերին։

«Մենք հասկանում ենք, որ մտել ենք մի պայքարի մեջ, որտեղ ելքը մեկն է՝ հաղթանակ։ Մենք հիմա իշխանություն ստանձնելու թրեյնինգի մեջ ենք»,- ասաց նա։