Ձեր վստահելի աղբյուրը

Այսօր յուրաքանչյուր հանդիպումից հետո ինձ մոտ մեծ հույսեր կան, որ ունենք առողջ դատողությամբ ժողովուրդ՝ երկրի ճակատագրով մտահոգված և հայրենասեր։ Այս մասին Վեդիում «Հայաստան» դաշինքի հանդիպման ընթացքում ասաց ՀՀ երկրորդ նախագահ, դաշինքի առաջնորդ Ռոբերտ Քոչարյանը։

Նա հույս հայտնեց, որ հասարակության այդ զանգված է լինելու ճնշող մեծամասնությունը և որոշողը։ Քոչարյանի դիտարկմամբ՝ ունենք նաև մոլորվածներ, անհասկանալի տրամաբանությամբ շարժվող, որոնց պետք է օգնել ճիշտ կողմնորոշման հարցում։

«Մենք մեզ պահում ենք որպես իշխանություն։ Իսկ այսօրվա իշխանությունն ամբողջ քարոզարշավի ընթացքում իրեն պահում էր որպես ընդդիմություն։ Սովորաբար իշխանությունը պետք է գա և հաշվետվություն տա, թե ինչ է արել, ոնց է տեսնում երկրի ապագան։ Ընդդիմությունը պետք է քննադատի, թե ինչն է սխալ արել իշխանությունը։ Հիմա ճիշտ հակառակն է՝ իշխանությունն անընդհատ քննադատում է, խոսում են ամեն ինչի մասին, բացի հաշվետու ժամանակահատվածից։

Եվ այդ ամենն ամենում են այնպիսի բառապաշարով, որը սովորաբար հուսահատ ընդդիմությունն է կիրառում։ Երբ իշխանությունն ունի ինքահաստատման կոմպլեքս, դա այլևս իշխանություն չի։ Այդ իշխանությունը վերջացած է»,- հայտարարեց երկրորդ նախագահը։

Ռոբերտ Քոչարյանը նաև նշեց, որ հանդիպումների ընթացքում «Հայաստան» դաշինքի ներկայացուցիչները փորձում են ներկայացնել քաղաքացիներին՝ այն ուժն են, որը կարող է երկիրը հանել այս իրավիճակից։

Նրա խոսքով, մի ողջ պետական համակարգ է քայքայված, որը վերականգնելու համար ժամանակ է պահանջվելու։