Ձեր վստահելի աղբյուրը

«Նա ասում է, որ պատրաստ է և երկրի ներսում անում է ամեն ինչ ժողովրդին միմյանց դեմ թշնամացնելու, և նույն նախադասությունը շարունակելով նշում, որ իրենք պետք է բարեկամանան Ադրբեջանի հետ»,- Ավշար համայնքում նախընտրական հանդիպման ժամանակ  հայտնեց ՀՀ երկրորդ նախագահ Ռոբերտ Քոչարյանը՝ ներկայացնելով մեկ ժամ առաջ Մասիս քաղաքում ուսուցչի կողմից իրեն փոխանցած Նիկոլ Փաշինյանի մի հայտարարության դրվագը:

«Հայաստան» դաշինքի առաջնորդը ներկայացրեց ուսուցչի խոսքը, ըստ որի՝ նախորդ օրը Նիկոլ Փաշինյանը ելույթ ունենալով մուրճը ձեռքին հայհոյել է իր ընդիմախոսներին և սպառնացել երկրի ներսում խնդիր լուծել և նույն նախադասության ավարտին կոչ է արել բարեկամանալ Ադրբեջանի հետ:

Ռոբերտ Քոչարյանը նկատեց, որ եթե Փաշինյանի համար այդքան կարևոր է խաղաղությունը և համերաշխությունն, ապա պետք է բարի լինի նախ իր երկրի ներսում այն հաստատի:

«Գիտակից մարդը սկզբից մտածում է, հետո՝ խոսում, ուղեղի և լեզվի կապն այդպես է, հիմա մենք մի դեպք ունենք, որ հակառակն է՝ սկզբից լեզուն է, հետո՝ խելքը»,- նկատեց Ռոբերտ Քոչարյանը:

Նրա խոսքով՝ կան մարդիկ, որոնք իրենց արարքների համար մշտապես այլ մարդկանց մեջ են մեղավորներ փնտրում, իսկ եթե այդպիսինները դառնում են պետության ղեկավար, ապա ամբողջ ժողվուրդը նրանց գերին է դառնում:

«Եթե որոշում կայացնելու պատասխանատվություն ես վերցրել քո վրա, ապա բարի եղիր դրանց հետևանքների համար էլ պատասխանատվություն վերցնել, բայց այսօր մենք ունենք մի իշխանություն, որը պատրաստ չէ որևէ չափի պատասխանատվություն վերցնել սեփական որոշումների համար»,- հայտարարեց Ռոբերտ Քոչարյանը և հավելեց, որ ժողովուրդը 2018 թվականին ընտրել է մի մարդու, որը ասել է, որ ինքն ամենալավն է, բայց իր ձախողումները սկսել է բոլորի վրա բարդել:

«Այս պատերազմի մեղքն էլ մի պահ փորձեց Ռուսաստանի գրպանը գցել, և նա պատուհաս է երկրի համար»,- հայտարարեց «Հայաստան» դաշինքի ղեկավարը և հավելեց, որ Փաշինյանը բերած պատերազմի, տնտեսական աղետի, տագնապալի արտագաղթի համար կրկին իրեն մեղավոր չի ճանաչում:

Նա հայտնեց, որ պատերազմից մի քանի ամիս առաջ, երբ 70 հոգուց ավելի մարդկանց պարգևատում էին «Մարտական խաչ»-ով, Փաշինյանը ասում էր, որ ամենամարտունակ բանակն ունենք և երկու ամսիս հետո պարզվեց, որ 80-ականների զենքերով են կռվում:

«Մենք ունենք անպատասխանատու իշխանություն, որն ընդունակ չէ երկու քայլ հեռու նայել, որը փչացրեց հարաբերությունները մեր բոլոր բարեկամ երկրների հետ և իշխանություն, որը թշնամի ստեղծեց Հայաստանի ներսում»,- հայտարարեց «Հայաստան» դաշինքի ղեկավարը և պնդեց, որ նման իշխանությունները չպետք է լինեին երկրի ղեկին և ժողովրդի ճակատագիր որոշեն և այսօր կա իրավիճակը շտկելու հնարավորություն՝ հունիսի 20-ին նրանց դեմ քվեարկելով: