Ձեր վստահելի աղբյուրը

«Իմ կենսագրության մեջ երկու անգամ ծայրահեղ ծանր վիճակում ես մտել եմ պատասխանատվության տակ և պատվով դուրս եմ եկել, սա երրորդն է և ես չեմ ցանկանում ձախողվել»,- Ամասիայում «Հայաստան» դաշինքի հանդիպման ժամանակ հայտնեց ՀՀ երկրորդ նախագահ Ռոբերտ Քոչարյանը:

Նա հայտարարեց, որ առանց հասարակության միավորման արդյունքի չեն կարող հասնել և շեշտեց, որ ակնկալում է ժողովրդի մեծ վստահությունը:

«Հայաստան» դաշինքի  առաջնորդի խոսքով՝ երկիրը իսկապես ճակատագրական պահ է ապրում և ինքը նման ընտրություններ Հայաստանում չի հիշում, և երբեք չեն գնացել ընտրությունների պարտվածի կարգավիճակում, որ նախկինում եղել են բազմաթիվ հիմնահարցեր, բայց անվտանգային խնդիրներ չեն եղել:

«Մենք ունենք մի իշխանություն, որը 2018 թվականին հարձակվել է եկեղեցու, բանակի և կրթության վրա, փորձել է պետականաշինության գործում մեր ազգային մտածելակերպի, պետականության բաղադրիչները նվազեցնել և չեզոքացնել»,- հայտարարեց Ռոբերտ Քոչարյանը և շեշտեց, որ դա է եղելայն հանգամանքը, որը իրեն ստիպել է մտնել ընտրական գործընթացի մեջ և ասել՝ եթե ոչ ես, ապա ո՞վ:

Դաշինքի առաջնորդը,  հայտնեց, որ գործող  իշխանությունն արժեզրկել է նաև պետական համակարգը և հնարավոր չէ հիշատակել մեկ պաշտոնյայի, որի վերաբերյալ մարդիկ դրական կարծիք ունենան:

Նկատելով, որ արժեզրկվել է բանակը և պետությունը՝ Ռոբերտ Քոչարյանը հայտնեց, որ խնդիրը հասարակության մոտից պարտվածի հոգեբանությունը հանելն է, քանի որ նա այդ հոգեվիճակում չի կարող ստեղծագործել և աշխատել, իսկ դրա համար պետք է հարթակից հեռացվեն այն մարդիկ, որոնք մեր ժողվորդին բերել են այդ պարտությունը:

«Միգուցե մեծամտութուն է, բայց մենք ասում ենք, որ այն մարդիկ ենք, որ կարող ենք երկիրը հանել այս վիճակից, պատրաստ ենք 24 ժամ և շաբաթը 7 օր աշխատել, բայց այս վիճակից երկիրը հանելու ենք, ես հավատում է դրան, եթե չհավատայի, ապա երբեք այս բեռի տակ չէի մտնի»,- վստահեցրեց «Հայաստան» դաշինքի առաջնորդը: