Ձեր վստահելի աղբյուրը

«Մի իշխանություն է փորձում վերընտրվելու, որն իր խոստումներից ոչ մեկը չի կատարել, որն իր կադրային ռեսուրսներով գրեթե զրոյական կետի վրա է գտնվում»,- արթիկցիների հետ հանդիպման ժամանակ հայտարարեց «Հայաստան» դաշինքի առաջնորդ Ռոբերտ Քոչարյանը և հավելեց, որ 2018 թվականին բոլորով իշխանության են բերել մի ուժի, որն արժեզրկել է պետական ողջ համակարգը:

Նա նշեց, որ իշխանությանը կարելի է վստահել, կամ չվստահել, բայց երբ դադարում են նրան հարգել որպես իշխանություն, ապա այն աղետի է բերում, ինչը նշանակում է՝ այդ կառավարությունը ոչ մի ծրագիր չի կարողանալու իրականացնել:

«Հայաստանն այն երկիրն է, որը մշտապես ունեցել է անվտանգության չափազանց լրջագույն սպառնալիքներ և այդ երկում 3 տարում փոխվում է ԱԱԾ 5 ղեկավար, ԳՇ  4 պետ, վերջինս այն դեպքում, երբ չհայտարարված պատերազմի մեջ է գտնվում: Տնտեսական ճգնաժամ ապրող երկրում 3 էկոնոմիկայի նախարար է փոխվել, սա դիվերսիա է՞, թե՝ հիմարություն, պետք է դուք  որոշեք»,- հանդիպման մասնակիցներին դիմեց ՀՀ երկրորդ նախագահը և հավելեց, որ ներկա իշխանությունը չի հասկանում, թե ինչ է նշանակում իշխանական համակարգում կայունությունը:

«Հայաստան» դաշինքի առաջնորդը նշեց, որ այսօր երկրում արտաքին գործերի նախարարություն չկա, որպեսզի այդ կարևորագույն ոլորտում աշխատանք տանի և այդ ամբողջ համակարգի գլխին կանգնած է մարդ, որն ինքն իրեն չի կարողանում կառավարել, բայց համարում է՝ երկիրը կարող է կառավարել:

Հայտարարելով, որ հաղթելու են ընտրություններում, քանի որ մրցակիցներից առավել են փորձով և գիտելիքներով՝ ՀՀ երկրորդ նախագահը հայտարարեց.«Մենք երբեք իրավաբանին չենք դնի առողջապահության ոլորտը ղեկավարելու համար, կամ պատմաբանին չենք դնելու ջրային տնտեսություն ղեկավարելու, մենք հենվելու ենք մասնագիտական գիտելիքների վրա և նշանակելու ենք մարդկանց, որոնք իրենց տեսակով ի վիճակի են ուրիշներին կառավարել»:

Ռոբերտ Քոչարյանը հավաստիացրեց, որ կառավարման համակարգում ներգրավելու են մարդկանց, որոնք կարևորում են իրենց հեղինակությունը և չեն դասվի այն մարդկանց թվին,  որոնց պաշտոնը թողնելուց հետո նույնիսկ հարևանները չեն բարևում:

«Գործող իշխանական թիմին եթե հիմա մեկ-երկու հոգի բարևում է, ապա պաշտոնից դուրս գալուց հետո այդ երկուսն էլ չեն բարևի»,- ասաց ՀՀ երկորդ նախագահը:

Հայտարարելով, որ իր թիմով նպատակադրված են ազգային պետություն կառուցել, տնտեսությունն արագ վերականգնել և անվտանգության հարցեր լուծել, որի համար ինքն ունի այդ փորձը՝  Ռոբերտ Քոչարյանը դիմեց ներկաներին՝ խնդրելով իր խոսքը հասցնել այն քաղաքացիներին, որոնք դեռ չեն կողմնորոշվել, թե ում են իրենց ձայնը տալու: