Ձեր վստահելի աղբյուրը

«Այս երիտթալանչիները խոսում են կոռուպցիայի մասին, բայց ամենամեծ կոռումպացվածներն ու թալանչիներեն իրենք են»,- «Պատիվ ունեմ» դաշինքի քարոզարշավի շրջանակում Կոտայքի մարզ քաղաքացիների հետ հանդիպմանն ասել է դաշինքի վարչապետի թեկնածու, «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը։

Նա նշել է, որ նրանք շատ խորամանկ են, խորամանկ ձևերով են թալանում մեզ բոլորիս։

«Պարզ օրինակ. գնում են քարոզարշավի, տեսաք՝ ինչքան մարդիկ ենք իրենց հետ տանում տարբեր մարզեր, տարբեր բնակավայրեր, ինչքան մեքենաներ են ուղեկցում այս կապիտուլյանտին և այդ ամենն արվում է մեր բոլորի գումարներով, պետբյուջեի հաշվին»,- ասել է Ա. Վանեցյանը։

Արթուր Վանեցյանի խոսքով, տպավորություն են ստեղծում, որ ունեն տասնյակ հազարավոր աջակիցների բանակ, բայց իրականում այդպես չէ։

«Հազար և ավելի դոլարները, որ ծախսում են ֆեյքեր պահելու համար, եթե մենք հաշվենք և հասկանանք, թե այդ գումարով քանի ուսուցչի կամ քանի բժշկի աշխատավարձ կարող են բարձրացնել, կհասկանաք, որ  նրանք այդ տպավորությունը ստեղծում են մեր բոլորի հաշվին, մեզնից գողանալու հաշվին։

Դրա մասին  կարող ենք խոսել շատ երկար, կարող ենք խոսել նրանց անհիմն բաժանված պարգևավճարների մասին, նրանց չհիմնավորված ծախսերի մասին անգամ պատերազմի ժամանակահատվածում։ Խոսք կա՝ գողն առաջինն է գոռում գողացան, որ իրեն չմեղադրեն»,- ասել է «Պատիվ ունեմ» դաշինքի վարչապետի թեկնածու Արթուր Վանեցյանը։