Ձեր վստահելի աղբյուրը

Ես գյումրեցի չեմ, Գյումրիում երբեք չեմ ապրել, բայց տասը տարվա ընթացքում այնպես ստացվեց, որ իմ սրտի մի մասը մնաց Գյումրիում։ Այս մասին Գյումրիում ընթացող «Հայաստան» դաշինքի հանրահավաքի ժամանակ ասաց  Արցախի առաջին և ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը։

«Առաջին անգամ 1997 թվականին եկել եմ Գյումրի, նորանշանակ վարչապետ էի, վիճակն այնպիսին էր, որ ինքս ինձ համար երդվեցի, որ այս քաղաքի դեմքը պետք է փոխենք, վերականգնենք։ Այն քաղաքը,որի մասին միշտ լսել էինք՝ իր թասիբով, հոտով, համով։ Այսօր շրջելով քաղաքով, կարող եմ ասել,որ հիշում եմ բոլոր շենքերը, նույնիսկ որ շինարարը ՝ որ շենքն էր կառուցում կամ ամրացնում, բոլոր հրապարակները։ Մեկ-մեկ մտածում եմ՝ չգիտեմ ոնց ստացվեց, բայց Գյումրին ոնց որ Ստեփանակերտից ավելի լավ եմ ճանաչում»,- ասաց Քոչարյանը։

Անդրառալնալով անելիքներին և նախընտրական ծրագրերին դաշինքի առաջնորդը գյումրեցիներին տեղեկացրեց,որ գալիս են շարունակելու կիսատ գործերը։

«Մենք գալիս ենք Ձեր կյանքը բարելավելու համար։ Սա է մեր նպատակը։ Վստահ եղեք, երբ խոսում ենք  Հայաստանի մասին՝ խոսում ենք տարբեր մարզերի համաչափ զարգացման  մասին։ Ինձ համար չափազանց հաճելի էր լսել, տեսնել, որ Գյումրին իրականում դառնում է տուրիստական կենտրոն։ Դուք այդ պոտենցիալն իսկապես ունեք։ Մենք որպես մեկ քաղաքական միավոր, վստահ ենք՝ գալիս ենք իշխանության և ձեր հզորությունն ավելացնելու, դեպի առաջ մղելու, երկիրը զարգացնելու և բոլորին  համերաշխություն բերելու»,- նպատակները ներկայացրեց Քոչարյանը։