Ձեր վստահելի աղբյուրը

«Փաստ է, որ կապիտուլյանտը պարտվում է և հունիսի 20-ին բոլորով միասին՝ պատիվ ունեցող քաղաքացիներով, դուրս ենք շպրտելու վերջինիս իրեն արժանի վայր՝ քաղաքական աղբատեղի»,-ասուլիսում ասաց «Պատիվ ունեմ» դաշինքի անդամ, «Հայրենիք» կուսակցության մամուլի խոսնակ  Սոս Հակոբյանը:

Նա հիշեցրեց ՀՀ երրորդ նախագահ Սերժ Սարգսյանի երեկ արած հայտարարությունը, որ ծանոթացել է պատկան մարմինների կողմից կազմված գաղտնի զեկույցի, ըստ որի, կապիտուլյանտն այլևս ՀՀ-ում չունի մեծամասնություն, բնակչության մեծամասնության վստահություն:

«Սա չի նշանակում, թե պետք է թուլանալ, այլ տրամադրություններ են ուսումնասիրված, որոնք դեռ պետք է իրացնել հունիսի 20-ին՝ հստակ ամրագրելով մեր քվեով ու Հայաստանին հնարավորություն տալ իրապես վերադառնալ զարգացման ուղի»,- ասաց Ս. Հակոբյանը:

Նա նշեց, որ որևէ քաղաքական ուժ այս ընթացքում ցույց չտվեց արտաքին քաղաքական  աջակցության այնպիսի դիապազոն, ինչպիսին «Պատիվ ունեմ» դաշինքը:

Սոս Հակոբյանը հիշեցրեց դաշինքի վարչապետի թեկնածու Արթուր Վանեցյանի այցը Մոսկվա, որտեղ տեղի էր ունեցել պաշտոնական հանդիպում ՌԴ Պետդումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահ Լեոնիդ Կալաշնիկովի, նրա տեղակալի հետ, բացի այդ եվրոպական քաղաքական ընտանիքի ամենախոշոր անդամներն՝ Եվրոպական Ժողովրդական կուսակցություն ու Կենտրոնամետ Դեմոկրատների Միջազգային Միություն, իրենց աջակցությունն են հայտնել ՀՀԿ-ին:

«Ակնհայտ է, որ «Պատիվ ունեմ» դաշինքը ցույց է տալիս նաև արտաքին քաղաքական ասպարեզում իր ուժը և ամսի 20-ից հետո իր հնարավորությունները ծառայեցնելու է Հայաստանի ազգային շահերին»,- ասաց Ս. Հակոբյանը:

Նա նշեց, որ իրենց համար կարևոր է երեք մայրաքաղաքների՝ Ստեփանակերտ, Մոսկվա և ՀՀ հոգևոր մայրաքաղաք Էջմիածին, հետ ունեցած հարաբերությունները: