Այսօր Հ1-ը կարծես «Ազատություն» ռադիոկայանը լինի, տարբերություն չկա. Ռոբերտ Քոչարյան

Քաղաքական 18:10 17/06/2021 Հայաստան

«Այսօր Հ1-ը կարծես «Ազատություն» ռադիոկայանը լինի, տարբերություն չկա: Մեր ժամանակ մի քիչ ամոթ կար, մենք ասում էինք՝ մի քիչ չափերի մեջ մնացեք, այսօր լրիվ ուրիշ է»,- պատասխանելով իշխանությունների ապազգային և ներքին թշնամանք սերմանող վարքագիծը կանխելու վերաբերյալ «Միասնական հայրենիք» կուսակցության պատգամավորության թեկնածու Լուսինե Ավագյանի հարցին՝ Գավառում նշեց «Հայաստան» դաշինքի առաջնորդ Ռոբերտ Քոչարյանը:

Նա նկատեց, որ ազգային գաղափարախոսության պահպանման տեսանկյունից գոնե Հ1-ը նախկին իշխանությունների տարիներին պրոբլեմներ չի ունեցել, եղել են դեպքեր, որ ընդդիմությանն այն ժամանակ փոքր տեղ են տվել, բայց որ ամբողջ հեռուստատեսության եթերը հակառուսական քարոզչություն անցկացնի, որն ուղղակի սպառնում է երկրի անվտանգությանը, չի եղել:

Ռոբերտ Քոչարյանի խոսքով՝ երբեք չի եղել, որ Հ1-ը դառնա սորոսական, գլոբալիստական գաղափարների քարոզիչ:

«Դասալիք, դասալքության համար դատված պատգամավորը, որոշակի հակումներով, չասենք ինչ հակումներով, և ակնհայտ աշխարհաքաղաքական առումով մեր երկրի այսօրվ մոտեցումներին չհամապատասխանող քարոզով գնում է զորամաս, այնտեղ էլ զինվորներին շարքով կանգնեցնում են նրան լսելու: Այս վիճակում բա պատերազմը պարտվելու էինք»,- հայտարարեց Ռոբերտ Քոչարյանը՝ ներկայացնելով գործող իշխանության վարած քաղաքականությունը:

Ըստ նրա՝ ներկայիս իշխող ուժի՝ փոքր խմբակցությամբ ներկայությունն ԱԺ-ում խնդիր չէ, քանի որ խորհրդարանում միշտ էլ պայքար է գնացել, բայց ներկաներին պետք է միանշանակ զրկել գործադիրի լծակներից, մասնավորապես ,Հանրային հեռուստատեսության վրա ունեցած ազդեցությունից, որպեսզի ավելի քիչ հնարավորություն ունենան հակապետական քարոզչություն տանել:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: