Ձեր վստահելի աղբյուրը

«Անձերի շնորհիվ 90-ականների սկզբին մենք դարձել ենք հաղթող ժողովուրդ, երկիր և նոր էջ էինք բացել մեր պատմության մեջ, քանի որ դարեր շարոնակ այդպիսի հաղթանակ չէինք ունեցել»,-Գավառում «Հայաստան» դաշինքի հանդիպման ժամանակ հայտնեց ՀՀ երկրորդ նախագահ Ռոբերտ Քոչարյանը:

Շարունակելով միտքը՝ նա նշեց, որ մեկ անձի պատճառով  2020 թվականին հայ ժողովուրդն ունեցել է պարտություն և խաչ քաշել 90-ականների ձեռքբերումների վրա:

«Հայաստան» դաշինքի առաջնորդի խոսքով՝ պետք է փակել այս ամոթալի էջը, բայց դրա համար նախ պետք է հեռացնել այն դեմքին, որը 5 հազար զոհի, 11 հազար վիրավորների և բռնագաղթվածների պատճառ է դարձել:

Անդրադառնալով գործող իշխանությունների կողմից ստեղծված երեք՝ անվտանգային, տնտեսական և ներքաղաքական հիմնական հիմնախնդիրներին՝ ՀՀ երկրորդ նախագահը նշեց՝ թվում էր, թե պետք է սիրո հեղափոխության առաջնորդը ներողություն խնդրի այդ աղետի համար, բայց նա դրա փոխարեն մուրճով է սպառնում իր արարքի դեմ ըմբոստացածներին:

«Այն ուժերը, որոնք այդ մարդուն կառավարում են, շատ լավ գիտեին թե ինչ է արվում»,- հայտարարեց Ռոբերտ Քոչարյանը՝ պնդելով, որ հակապետական գործունեությունը Նիկոլ Փաշինյանն արել է գիտակցաբար:

Նա հայտարարեց, որ նման քաղաքական ուժը հնարավորինս փոքր մանդատներով պետք է հայտնվի խորհրդարանում, բայց ավելի արդար կլիներ, որ ընդհանրապես չգային:

«Մենք պետք է պետությունը վերադարձնենք ժողովրդին»,- ասաց «Հայաստան» դաշինքի առաջնորդը: