Ձեր վստահելի աղբյուրը

«Ակնհայտ է, որ այլևս որևէ քաղաքական  ուժ Հայաստանում չի կարող համարվել ամբողջական ժողովրդի աջակցությունն ունեցող ուժ և որևէ մեկը չի կարող համարվել ժողովրդական առաջանորդ»,- քարոզարշավի շրջանակում լրագրողների հետ զրույցում ասաց «Լուսավոր Հայաստան»  կուսակցության առաջնորդ Էդմոն Մարուքյանը: 

Ըստ նրա, բոլորը սովորական քաղաքական գործիչներ են դարձել, այդ իմաստով այլևս երեք տարվա հեղափոխության իրողությունները չկան:

«Կա ընտրարշավ, կան էլեկտորալ նշանակություններ, ըստ էլեկտորալ իրավիճակի ոչ մի ուժ չի հաղթել այս ընտրություններում, ինչպես ասում ենք մենք՝  պետք է հաղթի  ժողովուրդը: Դա նշանակում է, որ Հայաստանում առաջին անգամ  խորհրդարանում պետք է ձևավորվի ազգային համաձայնության և միասնության կառավարություն, որտեղ իրենց փոքր, մանր ճիշտը մի կողմ են դնելու, պարտավորված են  զգալու  այդ պրոֆեսիոնալների կառավարությանն աջակցություն  ցուցաբերել՝ յուրաքնարչյուրն իր ներդրումն ունենալով, և միայն այդ պարագայում երկիրը կարող է դուրս գալ այս վիճակից»,- ասաց Մարուքյանը:

Նա ընդգծեց, որ իրենց տեսնում են այդ համերաշխությունը բերողի առաքելությունն  իրականացնողի դերում:

Է.Մարուքյանը վստահեցրեց, որ Հայաստանի մարտահրավերները շատ ավելի մեծ են, շատ ավելի բարդ ու սուր են, քան պետության, Հայաստան-Սփյուռքի,  եռամիասնության հնարավորությունները, հետևաբար օդ ու ջրի պես  պետք է համախմբված լինել ընդդեմ այդ մարտահրավերների և հանուն այս վիճակից դուրս գալու, ուրիշ այլընտրանք չկա:

Հետընտրական ցնցումներ հնարավո՞ր են հարցին ի պատասխան, Էդմոն Մարուքյանն ասաց. «Փորձելու են տանել ցնցումների, բախումների, բայց  մեր ռազմավարությունն աշխատելու պարագայում դա էլ չի կարող տեղի ունենալ, քանի որ չեն ունենալու այնքան աջակցություն, որ ասեն՝ ես հաղթել եմ: Հետևաբար համակերպվելու են  յուրաքանչյուրն իր 20 տոկոսանոց ձայների հետ, գալու են, խելոք կլոր սեղանի շուրջ  նստելու են և ձևավորելու ազգային  միասնության կառավարություն:

Փորձեր,  բնականաբար, լինելու են, բայց  ժողովրդի ձեռքում է՝ այդ ցնցումները կլինեն, թե ոչ,  եթե ժողովուրդը չի աջակցում իրեն ցնցումների տանող ուժերի, ցնցումներ ո՞նց կարող է լինել»: